uMthunywa
SiloMehleli Dube
BAKHONA abanye abantu abalolunya lwendlondlo emnyama elophaphe ekhanda yona eluma noma kungaba yini engakudliyo, ikholise ukutshiya kuyizidumbu zibola.
Ngikhumbula ngiselusa yake yaluma amathokazi amathathu kamakhelwane afa, lenyama yakhona asiyidlanga ngoba kwathiwa itshefu yayo isigijime yagcwala umzimba wazo lezonkomo okungabangela ukuthi kucine kusifa lodle inyama yakhona.
Umuntu olomoya omubi ungamkhangela isikhathi esinengi uhlala ezondile, engazi lokuthi udinwe yini. Kanengi umuntu olomoya omubi ubalomhawu, kafuni kubona omunye umuntu elento enhle usuka azonde ngoba uhlezi encintisana labantu abangancintisani laye.
Akhohlwe ukuthi into angancintisana layo yisikhathi, ngikhumbula omunye umakhelwane wayengafuni ukubona omunye umuntu elemali, wayecabanga ukuthi nguye yedwa olemali enengi, kwakuthi nxa umuntu angathenga izinkwa ezimbili zabantwabakhe yena athenge eziyisithupha zicine sezibola nanku phela imuli yakhe yayinganganani.
Umhawu wakhe yiwo lowo esiwubiza sithi ngumhobholo. Wayethi angabona umuntu elento yena angelayo umthole esezondile, eseqhuqha kungani unethwe ngumfasimba kaMabasa. Ngelinye ilanga wazondela umntakamakhelwane wakhe owayevela eGoli ebuye lemota ecwazimulayo lezi ezibeletha ivili. Wazonda iBp yakhe yaze yakhwela wayalaliswa esibhedlela okwamalanga amathathu. Ngikhumbula mhla ephumayo esibhedlela omunye umongikazi wamxwayisa ukuthi kumele ahlale ejabulile njalo akhulume kakhulu labantu ahlala labo ukwenzela ukuthi izinga lakhe lokuthaba lihlale liphezulu (happiness index). Wgcizelela njalo ethi ukuhlala umuntu ejabulile kuyathiba ukuvusa imikhuhlane efana lobotshukela layo kanye iBp.
Wameluleka umongikazi ukuthi angabi lomhawu ngoba wenza umuntu acabange kakhulu njalo legazi ligijime kakhulu licine libangela ukudubuka kwemithambo umuntu acine esifa. Kwakungani ubekwazi lumongikazi ukuthi lapha kusesiphaleni somhawu ngathola umuntu omdala esephonguthi lwayi lwayi amehlo kungani lunwabu olutshiswa lilanga, kungela sihlahla eduze ukuthi lunombele.
Bakhona abanjalo abantu abalochuku lukaTshaka yena ayengakuthathi mango ukuphephuluza umphefumulo womuntu. Abanye ngolunya lwabo ludlula olukaHerod owayeyinkosi esibala ngayo ebhayibhilini.
Ayixabene.
