uMthunywa
BAKAMTHWAKAZI ngithanda ukuza lamazwi enkuthazo ikakhulu kubantwana besikolo ngenhloso yokuthuthukisa ezemfundo lapha koMthwakazi. Ngitsho ngikhuthaza abantwana njengoba nje izikolo zivaliwe okwakhathesi akutsho ukuthi abafundi badele ukubala.
Inengi labantwana besikolo kwakuthi nxa kuvalwa izikolo bakhohlwe ukuthi ngabantwana besikolo baziphathe njengezakhamizi asazi ukuthi basuka babuswe yimimoya bani. Kabazi yini ukuthi ukuvalwa kwezikolo kutsho ukuthi bathole ithuba lokubala izifundo abazifundayo kanye lokubala abazakwenza ukuze nxa sebefundiswa esikolo babe sebelolwazi olulingeneyo.
Kunjalo-ke abanye abantwana bathi ngokuya kukhefu bavuke ubunke baba umthole sephothe ngitsho lenwele kuthi sehlala ebhoda edolobheni kumbe ezitolo egqoke izikipa lezi ezafikayo eziveza izisu egcekeni lamabhulugwe anamathela umzimba. Uthole umntwana sengathi ngokudoli okudwetshwe ebhukwini lika Giredi 1.
Okusuka kudanise yikuthi abazali babantwana abanjalo bayabe bebabukele kodwa nxa sebengasaphumelelanga ezifundweni baqale ukuzwa ubuhlungu asazi kumbe bayabe bethi ukuya esikolo yikho ukuphumelela yini. Kambe umntwana ohlala ezula ezitaladeni engenza kuhle esikolo yena ehlala ezicabangela ukuzula hatshi isikolo? Asazi kwabanye, zizamana zilime ziyetsheni.
Noma nje kukhona abantwana abangezwayo noma bexwayiswa kodwa kulabo abathanda ukuxwayiswa ngithi nxa izikolo zivaliwe kunje kufanele bazihluphe ngokubala kanye lokwenza amaqembu okutaditsha ukuze baphumele ezifundweni zabo. Ngiyazi ukuthi babengahlayazi oMandulo nxa babethi akulamhlambi ongelanuta kodwa akutsho ukuthi umhlambi wonke ungaba ngowenuta kuphela. Ngalokhu-ke ngithi labo abazibona ukuthi sebezafaniswa lenuta kuqakathekile ukuthi babambe ziqine babale kakhulu ezifundweni ukuze baphumelele.
Ngiyazi ukuthi kulezinsuku abantwana sebegangile, umntwana uyasuka endlini kumbe ekhaya ethi uya esikolo koZibanibanyana kulombalisi ofundisayo kanti uziyela ekuzithokoziseni kwakhe. Uthola umntwana lo seziyele emajaheni akhe nxa eyintombazana eyotshona khona beyengana akhohlwe ukuthi uzibulalela ikusasa lakhe.
Ekucineni umntwana lo uzwa kuthiwa sezithwele losomoya wakhe lo setshaye utshani. Asazi ukuthi kungani lingafundi isifundo kwabanye elihlala libabona bantwana? Yeka ngowathi zithiywa ngezikudlayo.
Ngikhuluma nje inengi labantwana besikolo litholakala lidakwe lingasazazi asazi ukuthi lisuka lingenwe yini.
Njengakhathesi khona izidakamizwa lezi ezafikayo zibathwalise nzima abantwana. Angithi nje zonke indawo ezithengisa izidakamizwa esezivelile zivezwe yibo abantwana besikolo laba okuchaza ukuthi sebebanengi kakhulu abaphatheka ekudakweni lokhu.
Pho abantwana abanjalo balandani esikolo njengoba nje bezabe bezidakelwe. Kambe ingwalo zake zangenelana lotshwala kumbe imbanje? Bantwana besikolo lingadlalisa ithuba lokufunda lizatsha okamazokhela, liyikhothe imbenge ngolimi. Guqukani bantwana lilole ikusasa yenu.
