uMthunywa
MHLA kutshada umngane wami omkhulu esafunda sonke kusukela ezingeni eliphansi saze saya sonke kumfundo zekolitshini. Kwasekungani ngumfowethu wegazi akulalutho ayengifihlela lona lami ngokunjalo ngangithi kulento engiphicayo, ngimazise ngithi nxa ngingamtshela ngizwe lobunzima bento yakhona bungani sebehlisiwe.
Sawulungiselela umtshado wakhe ngangingumkhaphi omkhulu kuyimi njalo engizomela uyise nxa sokugqokiswana indandatho njalo sekufungwa phambili kukamfundisi. Yimi engangizaqhuba lowo msebenzi.
Into eyayihlala idukuda umoya wami ngomngane wami wawuthi nxa ungambuza ngoyise avele afikelwe lulaka lokuzonda athule. Ngemva kwesikhatshana athi asixoxe ngokunye mngane sitshiyane lalokho.
Kwakusuke kungimangalise ngoba ngisazi ukuthi incwadi engcwele ekaMvelingqangi isixwayisa ukuthi sihloniphe abazali bethu ukuze insuku zethu zande ezweni. Wayekhuliswe ngugogo ozala unina. Wayemthanda emenzela yonke into. Unina wayendile kwenye indawo engakhatshana kangako lakibo.
Ngelinye ilanga ngasiqunga isibindi ngambuza ukuthi kungani elokhophe labazali bakhe njalo wake wakuzwa ngaphi esintwini sakithi ukuthi umuntu uyatshada abazali bakhe bengekho ngoba ngeke ubusiseke lomtshado kungenzeka lihlangane lenkinga ekuhlaleni, mhlawumbe liswele inzalo likhuze umhlola.
Wacina ezwisisa sangena emoteni sisiya lapho okwasekwendele unina, laye wayeselesikhathi engakwazi ukubona umntanakhe, samthola evela hlakula ethwele inyanda yemfe.
Sithe simtshela ukuthi singobani njalo esebuza umngane wami ukuthi uyise engabe esaphila kumbe sewaya kobhekabezayo. Wasiqhinqa isililo, ngazama ukumthulisa ngimduduza kwaze kwathi ngelikade wathula waqala ukulanda indaba yakhe.
Wathi kumngane wami: “Ngicela ungixolele uyihlo wadliwa ngumswenya ngizithwele kangizange ngiphinde ngimbone.”
Unina womngane wami wayesebenza evinkilini wathi esezithwala sokumele ayebeletha umnikazi wesitolo wathi angasaphenduki ngoba ethi uqakathekisa ukuzala kulomsebenzi. Lokhu yikho okwamenza wacina emtshiya kugogo wakhe laye ethi uzama impilo wacina esethole enye indoda angazange ayitshele ukuthi ulomntwana amtshiye ngakibo yaze yayakufa iqiniso ingalazi.
Ngabona umngane wami ejuluka khona kugodola njengegogo lona eligijima emaqaqeni. Into ayikhulumayo engezwa lami ingijabulisa yikuthi wathi usemxolele njalo uzomthatha ukuthi abekhona emtshadweni lakanye sahamba labanye abafowabo abazalwa ngulobaba osewabhubhayo.
Kwatshadwa kwaba kuhle, inkaba kanina lomntwana yaqala ukuxhumana kakutsha. Banengi abantu abakhula belokhophe labazali babo kwesinye isikhathi umzali uyabe esenziwa yisimo kodwa kuqakathekile ukutshela umntanakho iqiniso ngoba lona ungeke ulifihle kokuphela, phela isiNtu sithi okulempondo akufihlwa emgodleni.
Ayixabene.
