uMthunywa
BAKAMALANDELA osokusenzakala kulezinsuku kuyethusa asazi ukuthi abantu sebangenwa yini? Engxenye kukhona imimoya esibusa koMthwakazi, nanku phela abanye abantu sebevuke eseganga benza iziga ezingajwayelekanga.
Izigigaba lezi isimanga yikuthi zivela endabeni zocansi asazi kumbe sokutheni bakwethu. Angithi nje maviki wonke kumaphephandaba kuhlala kuphuma izigigaba ezenziwa ngabantu ngendaba zomlilo wemvelo nje? Noma kunjalo abantu lapho bahle bakwenze ngamandla okusuka kugcwaliseke ukuthi zithiywa ngezikudlayo sibili.
Abanye abantu ngabahlanyiswa ngomakhwapheni baphethe besenza izimanga ezingazange zenzakala lasendulo.
Kuthi abanye ngabahle babalekele imuli zabo ngenxa yabomakhwapheni laba okusuka kudanise ukuthi sokungene moya bani kuleli.
Kwesinye isikhathi uzwa kuthiwa inkalakatha yendoda igijima lomntwana omncane ongalingani ngitsho lecinathunjana layo. Indoda enjalo isuka ibone umntwana lo sengcono kulomkayo ithi lanxa ifika endlini ingasakwazi lokuxoxisana kuhle lomkayo. Abanye ngabathi bengavela bancinde komakhwapheni baqale ukufika endlini phakathi kobusuku kum kusasa. Abanjalo ke kababuzwa lokuthi bavela ngaphi ngoba bahle baphenduke imbabazane nhokwayo.
Kuthi kunjalo indoda le iyabe ingafuni lakuzwa kuthiwa umkayo uke waphuma waya kweyinye indawo ngesikhathi ingekho. Yiwo ke amadoda alobukhwele obesabekayo khonapho enganiki omkabo isikhathi sabo. Yebo kambe akutsho ukuthi indoda ingaqala imigqa yayo umfazi kufanele ayilungisele. Kodwa kubalulekile ukuthi indoda nxa ithe yaphambanisa umkayo imvumele akhulume okusenhliziyweni yakhe ukuze umuzi wabo wakheke.
Kukhona njalo abesifazana abadela omkabo balandelane labafana abancane asazi ukuthi kuyabe sokutheni.
Khonapha ke yikho okuve khona izigigaba ngoba basuka bathathe amavifiyo bezitika ngoluju lwemvelo. Okusuka kumangalise yikuthi abantu laba kabadeli imikhuba yabo le kodwa mihla yonke amavidiyo la aphetha evelile emphakathini.
Kambe uyabe usasengumuntu onjani nxa ubuze bakho sobuvezwe emphakathini wonke umuntu esebazi? Lapha ke noma uhamba kuzulu uyabe ungasasengumuntu walutho. Angithi nje inhlamba enkulu yibunqunu bomuntu? Pho nxa sibuvezele uzulu uyabe usaselenhlamba yini empilweni yakho?
Ngikhuluma nje kuviki ephelileyo kulenina ebelikhanya lilesithunzi emphakathini kodwa okusuke kwadanisa yikuthi lelinina lasuka lathaba kakhulu lavumela umfanyana ebeliganga laye ukuba athathe amavidiyo besotha umlilo wemvelo. Njengoba bethi okungapheliyo kuyahlola, umfana lo nango ekuveza emphakathini ngemva kokungezwani phathi kwalaba bobabili.
Okudanisayo yikuthi lelinina lingumbalisi okokuthi labanye abantwana besikolo abagangileyo kudala bebubonile ubunqunu balo. Kuthi kunjalo lingomunye wabakhokheli ebandleni asazi ukuthi lizayibikela bani indaba engaka njengoba selinqunu kuzulu.
BakaMthwakazi ake sizame ukwakha ubuzwe bethu ngokuthula, siguquke sitshiye ububi lobu osobutshabalalise ubuntu kanye lesithunzi sethu.
