uMthunywa
Mehleli Dube
NGAngixoxa lenye indoda engafunda layo kuzinga lezifundo zaphansi eseyaphenduka yaba ngumgulukudu womkhonyovu wesela lezifuyo, seyaphenduka usibindi khithi, ucala celeni, lovalo ayiselalo.
Wayengilandisela ukuthi nxa bengakaphumi ijumo lokuyatshontsha baqala ngokuya kubaphurofethi kumbe ezinyangeni, bona abakholelwa ukuthi bayabona okusemakhazeni, bephenyisisa ukuthi uhambo lwabo ngeke lube lempazamo sebedibana labo mthetho kumbe lamaqembu abunjwa yizakhamizi avikela impahla zabo okuthiwa yimiphatho.
Isimanga yikuthi incwadi engcwele iyakufakaza, njalo iphinde ixwaye ukuthi umuntu angatshontshi, pho-ke labobaphurofethi abanika imithandazo yokuthi lawomasela abelenhlanhla kanogwaja umasila ekufeni, uphunyuka bemphethe, bona elabo iBhayibhili ngelinjani?
Yikuxhwala komuntu ngokuthanda imali, njengoba kulesitsho esithi imali yimpande yesono.
Kuvamile emhlubulweni weMatabeleland South ukuthi lezinyanga mthakathi labaphurofethi bamasalamusi babuya bevela kwezinye indawo, labantu bakithi bathatheke, njengamahlamvu egonde awomileyo ethatha ngumgelezo wesifudlana.
Ufica amasela labaphurofethi laba kungamathe lolimi, ngaze ngathi komunye umphathi wesigaba, usobhuku kungani egcina umuntu odlisana lesela, waswela impendulo, ngahle ngayifunda ivaliwe ukuthi laye kuletshontsho alitholayo nxa sekuvela setshenzwa.
Isixwayiso sami kodwa kuye yikuthi akuqili lazikhotha emhlane njalo kwelinye ilanga indwangu iyalukhutha ugatsha ilaxazeke phansi.
Ayixabene.
Umlobi uthinteka ku: 0714355641
