uMthunywa
Cornelius Luphahla
NJENGOBA bethi kusinwa kudedelwana kambe kungabe babesoma yini abadala njengoba kuthiwa amehlo madala.
Kunjalo-ke nanku sikubona ngamehlo kwezenguqu intshantshu ziphenduka ingqukumbane umdlwane ongathungululi.
Kambe ngubani obesazi ukuthi kwelinye ilanga into zizaguquka zigaywe ngomunye umhlathi amanye amaqembu adumileyo kwezenguqu aphenduke insika yesawudo eyabonwa ngabantu? Nanku sikubona ngamehlo iziziba ziphenduka zisiba ngamazibuko.
Lonyaka kukhanya kutshitsha unwabu nanko phela iDeMbare ebidume ngezokunqoba kumnyaka ophelileyo lonyaka ihle yazibula ngengudula ngokwayo. Asazi kumbe izamelana njani lezilempondo ezipheqayo ezifana leTshilamoya kanye labo Chicken Inn.
Angithi nje kule iviki ephelileyo iDynamos ibhuqwe yiChicken Inn kabuhlungu okokuthi nga bekungabantu bethuzana bekuzathiwa iDeMbare idindwe kwasala udokoza. Kube njalo-ke ekubhuqweni kweDynamos, asazi kumbe kukhona eminye imizamo esazoyenza njegoba kukhanya kubetha umoya lonyaka.
Kumnyaka ophelileyo angithi nje iDynamos ibisenza iziga kwezenguqu kodwa lonyaka kusuka kuvele obala ukuthi kusinwa kudedelwana. Kambe ngubani obesazi ukuthi iDeMbare ingenziwa isihluku esingaka yiChicken Inn? Nanku sokwenzakele uzulu engakulindelanga, asazi kuyaphetha ngani njengoba imidlalo isaqala nje.
ITshilamoya yona ibingasabalwa kuntshantshu zenguqu emnyakeni ophelileyo njengoba nje iDeMbare ibe imana iyivube kabuhlungu libalele. Kube njalo-ke kwathi ngethuba ivuka iHighlanders yenza izimanga yadana iDeMbare. Kwaba njalo-ke lakhathesi kukhanya iDeMbare lokhu ilezinyalo zeBosso okudala ukuthi idliwe indlela edanisayo.
Angithi nje ngatsho Mthwakazi ukuthi lonyaka kunzima, kufuna amaqembu aphekwe avuthwa. Nanku-ke angaphekekanga seqalile ukubonakala emphakathini ngokubhuqwa ngamanye indlela emangalisayo.
Lapha koMthwakazi kukhanya lalonyaka inkezo izawela khona njengoba iHighlanders, Bulawayo City, Chicken Inn kanye leTsholotsho zikhanya zisidla ubhedu. Noma nje amanye amaqembu engazama ukuthubulana lalezintshantshu kodwa lonyaka kangiboni esenelisa ukuwanqoba.
Into emangalisayo yikuthi umholi weqembu leDeMbare kukhanya ubikele abalandeli balo ukuthi okwenza leliqembu linganqobi okwakhathesi yikuthi ubesahlolisisa umumo. Kambe ukuthi kungabe kuliqiniso yini leli kumbe ngamalimi ezansi? Asazi bakwethu sizayicela ivuthiwe lonyaka, ngeqiniso sizathi lidube ngamabala sethe bha!
Ngikhuluma nje lonyaka abanye sebebalekela amaqembu abawasekelayo ngenxa yokuthi amaqembu la kawasaphumeleli kwezemidlalo. Omunye wabasekeli beDeMbare kuthe ngemva kokudliwa kwayo kabuhlungu yiChicken Inn wezwakala sesithi yena sesekela iBulawayo City. Asazi kumbe layo ingadliwa uzadlulela phambili njalo.
Kuyagcwaliseka-ke ukuthi kusinwa kudedelwana lonyaka njalo iziziba seziphenduke zaba ngamazibuko bakwethu.
Sebezazichaphela abantu emazibukweni bagalule abagalulayo ezizibeni.
