uMthunywa
Cornelius Luphahla
SIZWE saMantungwa ngiyazi ukuthi abadala babengahlayazi nxa babethi indlala idlisa amanyala kodwa kuqakathekile ukubamba inhliziyo nxa umuntu sethe wahlaselwa yindlala. Indlala le engikhuluma ngayo akukhathalekile ukuthi yindlala yani kodwa kubalulekile Mthwakazi ukuxwaya imisebenzi emibi edalwa yiyo.
Ngiyazi ukuthi zinengi inhlupho ezikhathaza abantu lapha koMthwakazi kodwa akutsho ukuthi benze okubi ngoba ngeke kubasize ngalutho, isiphetho kuzabafaka emanyaleni. Ngitsho ngoba kulezinsuku zinengi izigigaba esizizwayo lesizibona zisenziwa ngabantu libalele ngitsho lasebukhweni bezinja.
Isimanga yikuthi kusa kwamalanga abantu babotshwa njalonje bentshontsha, bebambe iganyavu, bebulele kumbe benze okunje njalo okumangalisayo. Asazi ukuthi kungani bengakhathali ukwenza ububi lobu obubangenisa emanyaleni kusa kwamalanga. Okunye sokungathi umuntu uyabe engasafuni ukuphila engekho ejele.
Angithi nje kuviki ephelileyo kulendoda ebisihluphile ngokubhinya ubabhemi umnikazi waze wathi kungcono indoda le ihle imlobole imthathe. Kuthe kusenjalo nango esiyadlova umntwana omncane bakithi, okusuka kudanise ukuthi besokutheni. Ngeqiniso ngeke sithi umuntu onjalo uyabe ebuswe yimizwa ngoba ngeke ube lemizwa yokubamba umntwana omncane. Akusindlala-ke le, yikuganga sibili okudinga isijeziso esibanzi.
Kulezinsuku amasela wona angikhulumi, sokukompunzi idla emini batayi. Angithi nje enyangeni ezimbalwa ezedluleyo kubanjwe izigelekeqe zeLuveve zagwetshwa kabanzi sathi mhlawumbe buzathi khathalala ubugebengu kanti nkani baba, buyalolongeka. Kuthe kuviki ephelileyo njalo kwabanjwa omunye wezigebengu ezagqekeza esitolo eCowdray Park laye wagwetshwa kabanzi njalo. Isimanga yikuthi izigangi lezi kazikhathali, ziyaphambili ngobugangi lobu. Asazi kumbe yiyo indlala leyo, nxa kuyiyo kufanele abantu babambe inhliziyo Mthwakazi.
Emavikini amabili aphelileyo angithi nje eyinye indoda itholakale izitika ngenyama yenja elokitshini leMzilikazi khonapha koBulawayo. Isimanga yikuthi inja le ibingaphekwanga lokuphekwa okuchaza ukuthi bekungasondlala le kusabukhunkuli sibili ngoba kuyindlala ubezayipheka kumbe ayiwose inja le. Lokhu sokuveza obala ukuthi inengi labantu elenza izigigaba lezi libuswa yimimoya yobukhunkuli sibili.
Ngalokhu-ke Mthwakazi omuhle ondlela zimhlophe ngithi kuqakathekile ukuzibamba kanye lokubamba inhliziyo ukuze ungawelwa liyezi elimnyama. Nxa imimoya yabokhokho ikukhathaza zama amacebo okuyilungisisa kumbe ukuyixotsha ukuze ungaphethi sokuthiwa sulotsholiswe ubabhemi kumbe sutholakale uzitika enyameni yenja eluhlaza.
Ngithemba sengitshaye kwazwela bakaMalandela, ngayiphosa induku ebandla osokusele yikuthi munye ngamunye ayitshaye eyakhe ingquzu umphakathi ubhekile. Kusinwa kudedelwana-ke Mthwakazi ngakho ngithi ubuntu abande.
