uMthunywa
ANGITHI nje babengasomi endulo nxa babethi umntwana ongakhaliyo ufela embelekweni. Kunjalo nje, kodwa inengi labantu lisuka lingakukhangeli bafune ukuzenza bona abakwazi ukuzilungisela udubo bebodwa.
Injalo impilo, abanye abantu basuka bazitshele ukuthi ikhanda elilamehlo liyazibonela bekhohlwe ukuthi inyathi ibuzwa kwabaphambili. Yikho-ke okudala ukuthi umuntu aphile lohlupho lwakhe athi uzakufa lalo angalutsheli muntu.
Kambe uyabe ephila kuwuphi umhlaba ongaba lohlupho lwakhe yedwa engalubikeli abantu ukuthi bamsize.
Loba nje zikhona ezinye inhlupho esihlangana lazo emhlabeni kuba nzima ukuthi indaba enjalo uyiqalisele ngaphi ukuyibikela umuntu. Usizi yikuthi umuntu olohlupho olunjalo umthola esecikizekile uthi umkhangela umbone ukuthi kukhona okumkhathazayo.
Uhlupho olunjalo yilo oludala ukuthi uzwe kuthiwa umuntu uzibophele watshiya ebhale incwadi ebikela umdeni wakhe ukuthi ubehlutshwa kuyini emhlabeni. Kambe sibili lokhu kuyabe kusasizani njengoba uyabe usufile?
Kusuka kumangalise ukuthi nxa kungokwakhe yedwa kungani esekubikela abantu ngesikhathi sesifa. Kuhle kuvele ukuthi okwehlula amadoda kuyabikwa yikho nje abazibulalayo laba bekuveza bengakafi lokhu okubahluphayo.
Ngalokhu kuqakathekile ukuthi indaba yakho uyibikele abantu. Kwesinye isikhathi uthola umuntu ekhuluma yedwa aze anyikinye ikhanda asuke lapho ahlale okofuthelwayo. Isimanga yikuthi inengi labantu abanjalo ungaze umbuze ukuthi uhlutshwa kuyini umane athule nje, kavezi lutho ngitsho lakancane, aqine ngokuthi uzithulele nje.
Ngeqiniso kakho ongaphila yedwa kulo umhlaba okuchaza ukuthi uMvelinqangi wakwenza esazi ukuthi abantu bazaphila ngokududuzana nxa sebesezinhlungwini.
Loba nje abanye abantu befela ngaphakathi bethi bathembe ukuthi amadlozi angakibo azabasiza ayababona kodwa lawo ngeke wenelise ukuhlala ukhuluma lawo wodwa yikho kulezihlobo ngoba ngezokukuphathisa ebunzimeni.
Asazi lapho ngoba abaphansi kasikaze sibabone njalo kasazi ukuthi babona njani izinto. Kodwa kulokho esengike ngakubona akuvamanga ukuthi abakhuluma njalo bawuqede umnyaka bengabalandelanga abaphansi.
Usizi olukhona kulezinsuku yikuthi abantu sebephelile ngokuzibulala ngenxa yenhlupho abahlangana lazo bezithulele. Kambe nxa isizwe siphela kangaka ngobani abazaphatha kusasa njalo ngobani abazakhulisa intandane zalabo abazibulalayo? Ngalokhu kuqakathekile bakaMthwakazi ukuthi siguquke sakhe isizwe sethu ngembono eqotho.
Mahlabezulu akukho okomuntu oyedwa, konke ngokwabantu bonke loba kunzima njani indaba yakho ibikele abantu, ungahlupheki wedwa ngoba kusasa uzazisola ususithi ngabe wawuyikhulumile isatshisa.
