uMthunywa
Silo Cornelius Luphahla
ANGITHI nje kuthiwa kusinwa kudedelwana kodwa kwakungatshiwo lokhu osokusenzakala kulezinsuku ngokutshabalala kwamasiko. Ngitsho ngoba endulo amantombazana lamajaha bebesendiswa ngendlela eqotho, bekungekho ovuma ukuzendisa kungaziwa lokuthi uhlezi lomhlobo bani womuntu.
Kulezinsuku akusakhulumeki okwenziwa ngamantombazana sokuyisiYemujakala ulimi lwamazimu uqobo. Intombi isizendisa ize ibe labantwana ababili kumbe abathathu umkhwenyana engaziwa. Ngalokhu uyabe engahlayazi othi lafa elihle kakhulu.
Ekuloboleni lapha ijaha beliqala ngokukhipha isivulamlomo lokangaziwe besekuvunyelwana ukuthi libuye lizobonwa ngabakwabozala. Ekubonweni lapha angithi nje kwakusenzelwa ukuthi zonke izihlobo zentombi zimazi laye abezazi ukuze azihloniphe kuhle. Kwakunjalo-ke ngensuku izwe lisakhile.
Bekuthi ngemva kokwaziwa kwejaha kuvunyelwane phakathi kwabakibo kajaha labakibo kantombi ukuthi umthimba wokwendiswa kwentombi uzakuba khona nini. Lungabekwa-ke usuku lomthimba izaqhutshwa ngumthimba-ke intombi kuyedliwa kumpongolozwe kube kuhle kube njeya.
Umthimba lo ubuvame ukuthi ube ugoqela abantu abadala, amantombazana kanye lamajaha. Abadala bebesiba khona ngenhloso yokuzoqhuba kuhle isiko lakwabo. Amantombazana lamajaha labo bebesiba khona ngenhloso yokuzobonana phela mhlawumbe bathole osomoya emkhosini lo kanye lokuzofunda ukuthi isiko lokwendisa liqhutshwa njani.
Ekwendisweni lapha kwakuthi bekungahle kufunwe amalobolo kungakabonakali ukuthi intombi ilenzalo kumbe kayila. Bekuthi ngemva kokubonakala ukuthi intombi ilenzalo lapho-ke bekucelwa amalobolo ngokomkhuba njalo ngalesisikhathi kwakulotsholwa abantwana hatshi unina.
Okwakulezinsuku akusakhulumeki ngitsho laboMandulo nxa bengavuka bakubone bengamangala kuze kuyelamula ukuphuma kwelanga. Ngitsho nxa intombi ithe yavelelwa abakwabo babiza baze babizisise. Uthola kuthiwa umuntu ubizelwe inkomo ezilitshumi lemali phezulu kanye lokudla lempahla ezithile. Ubizelwa njalo kakwaziwa lokuthi ulenzalo kumbe kalayo.
Ngeqiniso indlela osokubizwa ngayo kulezinsuku yikho okudala ukuthi ontanga babone kungcono ukuthi bazendise kungaziwa. Noma kunjalo bontanga ukuzendisa khona akuzange kwabakuhle njalo akusoze kube kuhle. Ngitsho ngoba ungazendisa kodwa mhla uvelelwe yingozi emendweni wakho lowo owezihlahleni uzakubona ukuthi ukulandela umikhuba kuqakathekile.
Isimanga yikuthi amanye amantombazana yiwo ahle ale abheje ukuthi ijaha liyemvelela. Uzwa intombi ithi abazali bayo sebabhubha ngakho akulamuntu umkhwenyana ongavela kuye. Itsho nje abanewabo basawadla amabele okusuka kudanise ukuthi uyabe engenwe yini umntanabantu.
Bontanga libulala ikusasa yenu lelabantwabenu ngoba labo bazahamba nyawo lunye lani njengoba bethi ufuzo olubi luyamemetheka. Ngeqiniso lizazikhala selibona abantwabenu sebezenzela umathanda phambili kwenu bekhohlwa lokuthi lingabazali babo.
