uMthunywa
Cornelius Luphahla
NJENGOBA oMandulo bethi izandla ezinengi zilendima enkulu, kunjalo-ke umuntu ngumuntu ngabantu. Lapha ngichaza ukuthi uMthwakazi ukuze athuthuke kuqakathekile ukuthi abantu babambane okwengatsha zesihlahla njengalokhu okwakusenziwa endulo.
Ngiyazi ukuthi inengi kalikuzwisisi kuhle lokhu engikukhulumayo kodwa nje ngichaza into elusizo emphakathini.
Angithi nje ukuze umuntu aphumelele kuqakathekile ukuthi ancedisane labanye. Lapha ngikhuluma ngokuthi kuqakathekile ukuba abantu basebenze ndawonye lengatsha zikaHulumende ukuze bathuthukise isizwe sabo.
Angithi nje silamapholisa kuleli ngakho kuqakathekile ukuthi abantu bancedisane lawo ekugcineni ukuthula.
Ngikhuluma ngoba bakhona abantu abaphila lezigebenga kanye labanye abenzi bokubi kodwa bengelandaba lokubakhuza kumbe ukubikela amapholisa ngabo. Uthola umuntu ehlala lesela esazi ukuthi selihluphile ngokugqekeza kodwa akutshaye indiva lokhu afele ngaphakathi okwebutho likaTshaka.
Pho kungalungani elizweni nxa abantu bengathembekanga bakwethu? Esikhathini esinengi abantu abagcina izigangi lezi ziphetha sezibonele ngoba kuyabe kufana xathu lokugcina inyoka endlini. Ngakho-ke inyoka ungayifuya iyavuka okwayo ikulume.
BakaMthwakazi kuthiwa amathole akhethwa kusakhanya njalo impi inqatshelwa ingakafiki ebaleni lomuzi. Lapha ngichaza ukuthi kuqakathekile ukuthi ingozi ezinjalo sizenqabele zingakasehleli ngokubikela abomthetho ukuze bathathe inyathelo.
Kwesinye isikhathi uthola kuthiwa isigangi sidle lepholisa okuyikuthi umuntu wakhona uyabe esaziwa ngamapholisa ukuthi ulokuganga okuthile kodwa basuke bakutshaye indiva ngenxa yokufumbathiswa imali.
Kambe kungalungani elizweni nxa amapholisa lawo sewonakele kanje? Ngikhuluma nje banengi abantu abaziwa ngobubi njalo amanye amapholisa ayabe ebazi kodwa evalwa ngemali.
Pho kuyabe kusaseyikubambana bani okuvumela ubugangi emphakathini bakwethu? Lokhu kayisikho ukubambana engikhuluma ngakho, mina ngikhuthaza ngokubambana okulokuthula okungela bugebengu ngitsho. Ogangileyo kavezwe emphakathini ukuze amukele isijeziso esimfaneleyo.
Isimanga yikuthi uyathola kuthiwa umuntu omdala ubambe umntwana oyisihlobo iganyavu umdeni ukufihle uthi kusekhaya akufanelanga kubikwe emapholiseni. Kambe noma kuthiwa yibuhlobo lobo umuntu onjalo uyabe engadinga uzwelo na? Angithi uyabe ebulalela umntwana ikusasa lakhe njalo esikhathini esinengi abantu abanjalo basuka bathelele abantwana umkhuhlane. Pho uyabe umzwelelani umuntu olesihluku kangaka?
Noma nje kusenzakala izigigaba ezinjalo kodwa khathesi amantombazana segangile okumangalisayo. Intombi iyathandana lejaha ithi ingathola elinye sixabana laleli ebilalo isuke iyelibophisa ithi liyibambile khona kungamanga aluhlaza tshoko. Kwesinye isikhathi abazali basuka batshelele abantwababo eceleni bethi kabathi babanjwe iganyavu khonapho besazi ukuthi bayathandana.
BakaMalandela kuqakathekile ukukhuluma iqiniso lokubambana ngoba kuthuthukisa isizwe sakithi. Ngakho-ke sebenzani ngokubambana langokuthula ukuze sithuthuke.
