uMthunywa
Mehleli Dube
KUVIKI edluleyo kubanjwe umgulukudu wesela akade seliqede inkomo zabantu emhlubulweni waseGwanda South. Lelisela belitshontsha lize leqela langale komngcele waselizweni laseBotswana.
Ubethi angabotshwa umbone kusasa esephendukile egiya, eklamasa ethi ulabameli abanzima njalo usebenza labanye osahoho ababona ngezomthetho. Ubemelwa ngabameli abadula okwamagama ngoba ngehola elilodwa bebebiza imali enengi ongeke wena otshontshelweyo uyenelise.
Kodwa njengoba isiNtu siyatsho ukuthi kwelinye ilanga indwangu iyalukhutha ugatsha ilaxazeke phansi ikhumuke izinyo, njalo siphinde sithi akuqili lazikhotha emhlane. Kukanti umyalezo wencwadi eNgcwele ekaMvelingqangi iyatsho ukuthi ungatshontshi, pho ke njengoba yena ubephikisana lomyalezo kaNkulunkulu ezenza iqhalaqhala.
Labantu ayebatshontshela babemdleli ngqondo babambana babayimbumba befuna ukuthi babe lesiqiniseko sokuthi angazabe esathola ithuba lokutshontsha esigabeni sabo.
Uthe esebanjiwe wasekhumbula ukuthi imali ayezinika amagqwetha ebaqhatsha ngabe wazakhela inxuluma yomuzi kumbe wathenga izindlu emadolobheni ukwenzela ukuthi nxa esegugile imali yezindlu yayizamsiza.
Ngikhumbula ebuzwa waveza sobala ukuthi angabe phose sewatshontsha inkomo ezingedlula inkulungwane. Abameli bakhe ayebaqhatsha njalo ebathembile bona bagijima ngezimota ezibelethe ivili bathenga izindlu emasabhabha yena lokhe elala endlini yotshani. Inkomo ayezitshontsha wayengazifuyi wayezithengisa adle imali sekungani ngumuntu odla umuthi weqolo.
Uthe engasela mali abameli bakhe bamfulathela ngikhuluma kunjenje uphakathi useyikhumbula imali ayethenga ngayo utshwala etshintshanisa labomama phela lapho okulemali babizwa basabele njalo lapho okulemali ungathi bayayithungatha njengechalaha lilandela umkhondo wethokazi lebhalabhala elimithi.
Manengi amasela abazifica bekulesi simo bafa sebehawula sebeyimgaxa, sebezifananela lomdlwembe inja elandela noma ngubani kungakhathalekile ukuthi iyamazi.
Isixwayiso sami sithi masela liboqaphela amagqwetha kalithandi athanda imali zenu zingaphela bayalifulathela ufele ejele ubusukhumbula ukuthi ngabe wenza ulutho okade luzakunceda kusasa.
Ayixabene
