uMthunywa
Chocolate Pie/Dessert
Singazo izincindamlomo ezidliwa ngemuva kokudla kwemini kumbe okwantambama. Phela sigezisa umlomo ukuba usale umnandi lokhu okhokho ababesithi yikwehlisa ukudla okudlileyo. Bona-ke babesehlisa ngokunathwayo njengoba ngitshilo kuviki ephelileyo ngithe lihiqa kumbe amasi wona ngokwawo, inkovu, umhluzi loba amahewu. Lathi lamhlanje silazo izincindamlomo zokwehlisa esizibiza ngokuthi ngama-dessert ngesiLungu.
Hatshi bo izincindamlomo lezi zimnandi uqobo njalo zilemihlobo eminengi etshiyeneyo. Mina ngizimisele ekuphekeni kwami ukwethula ezinye zazo. Ngijonge ukuthi lina lezimuli zenu lidle likholise. Ekudleni ama-dessert ehlukeneyo ngezikhathi zonke. Kuhle ukwenza ama-dessert ngempelaviki abantu bonke bekhona ekhaya bantu kudliwe kukholiswe.
Chocolate Pie
Okudingakalayo
i) Ingxenye yenkomitsho yemajarina kumbe ibhata
ii) Amakota amathathu enkomitsho yetiye zetshukela
iii) Isigaqanyana esisodwa setshokolethi esiyi (1 ounce)
iv) Ukhezo lwetiye olulodwa lomhluzi wokunukisa mnandi obizwa ngokuthi yi-Vannilla essence.
v) Amaqanda amabili
vi) Ingxenye yenkomitsho ulaza (fresh cream)
vii) Amazambane akhanzingiweyo acezulwa asuswa amakhasi ayingxenye yenkomitsho
viii) Umganu ongahlala endaweni eqandayo.
ix) Itshebetshebe elimanzi elifakwe enditshini enkulu nxa ungelayo i-fridge
x) Umganu wokuhlanganisela
xi) Iphini (beater) okokutshaya amaqanda nxa ulakho
Ukulungiswa kwe-chocolate pie
i) Ncibilikisa isigaqa se-chocolate usiyekele siphole ungakasitheli phezu kwencutshancutsha yetshukela lemajarina.
ii) Thela umhluzi wokunukisa i-vanilla essence phezu kwakho ke osukuhlanganisile ngesilinganiso osiphiweyo.
iii) Faka iqanda linye ngalinye ngesikhathi utshaye okwemizuzu emihlanu kusiya kwelitshumi. Yenza njalo aze aphele wonke amaqanda.
iv) Hlanganisa konke lokhu kuze kuhlangane.
v) Khathesi tshaya ulaza ngokokutshaya amaqanda okwemizuzu emihlanu, thela ulaza utshaye.
vi) Bona ukuthi ulaza (cream) lusendaweni yonke.
vii) Thela amazambane ekhanzingiweyo phezu kolaza athi yalala indawo yonke.
viii) Beka umganu lo efrijini kumbe etshebetshebeni elilamanzi.
Ukudliwa
Ukudla lokhu akuphakelwa emganwini kulemcingolo wokuthi kudlelwa ngaphi. Kudlelwa kuma-dessert small dishes. Dlana lawe ama-dessert ozenzele wona ukholise.
