uMthunywa
UMPALAKAZI yinyanga yamadili ehlukeneyo, kuba lemithimba etshiyeneyo egoqela imitshado, eyabaqeqetshileyo, amalanga okuzalwa, abathuthukisiweyo ezikhundleni njalonjalo. Yinjabulo yodwa kule inyanga kuyagidwa hatshibo yisiphithiphithi.
Konke lapha okubuthenwe khona kuyadliwa yinkani izisu zize zibebomvu. Kugidwa kuphose kuqamuke inyawo.
Lapha ngizakuthi ngamafitshane nje mayelana leKhisimusi lokudla okungaphekwa kumbe ongakuphekela imuli yakho sihlobo.
IKhisimusi lilanga elizilelwa ngabantu phose umhlaba wonke, inengi lalababantu bekhumbula ilanga lokuzalwa kukaJesu. Sengitshilo ukuthi ukudla kuqakathekile nxa kuledili njalo kube ngokuphekwe kuhle okumnandi sibili, imuli yakho kayidle ikholise mhla welanga upheke lomaMoyo.
Lapha ekhaya kudingakala isitshebo esinengi, kungaba ngesenkomo, imbuzi, imvu, inkukhu loba ingulube.
Nanku okokupheka ngeKhisimusi
Inyama yembuzi ehlatshiweyo kumbe ethengiweyo. Inyama yenkomo ehlatshiweyo kumbe ethengiweyo, inyama yenkukhu loba imvu nxa uyidla.
Okuhamba lenyama nxa kudliwa
Amatshakada, irayisi, isitshwala, amagwili, imibhida eyehlukeneyo, amatamatisi lehanyanisi.
Nanku ongakupheka mhla welanga leKhisimusi.
Inyama oyithandileyo
1 Sika amaqatha amakhudlwana kuzitho lezi isifuba, intamo, imbambo, umhlubulo, umgogodla, ithebe lefitshane. Zonke lezi nyama ungazithenga esitolo gezisa inyama ngokwahlukana kwayo upheke ngembiza enkulu ibhodo.
2 Thela amanzi alingeneyo uzabe ulokhu uthela ize ivuthwe, thela isawudo ngokuthanda kwakho, sikela ihanyanisi letamatisi lapha upheka isintu akudingi ukukhanzingwa.
3 Zonke inyama zipheke njalo njengokwehlukaniswa kwazo. Ungenzi isiswayi kodwa ivuthwe ingadlithizeki nxa uyiluma, yekela ivuthwe ingahangulwanga ngumlilo omnengi.
4 Itshiye ilomhluzi olingeneyo wokudlisa amatshakada, irayisi isitshwala loba yini okhethe ukudlisa ngakho.
5 Ungafaki lutho kulo umhluzi ngoba ngobunengi benyama ujiyile.
6 Abanye benza umhluzi wodwa eceleni bawufake umthikazana. Nanzelela lapha siqonde ukupheka inyama lezi isintu, dlana ukholise.
Pheka isitshwala, irayisi kumbe amagwili wokudlisa lenyama le. Yekela abantu abakhona badle bakholise yiKhisimusi impela.