uMthunywa
Ethel Ncube
ITHABE imanzi te intokazi edabuka eMpandeni ePlumtree ngemva kokuthola isicoco kumcimbi weGlamour and Fashion Show oyenzelwe eSouth Africa ensukwini ezisanda kwedlula.
UMpumelelo Dumani oleminyaka engu-28 yokuzalwa njalo onguFashion Designer kunkampani ethungayo iReedel Clothing khonale eGoli uthole indondo yokuba nguMiss Mapressa July ngemva kokuvotelwa ukuba ubegqoke isigqoko esithungwe ngobunono ukudlula abanye bonke akade bekulo umcimbi weGlamour and Fashion Show.
UMthunywa uxhumane loMpumelelo oveze ukuba uswele imilomo ezinkulungwane ukuthi abonge abamvoteleyo okuyikho okwenze wathola isicoco lesi.
“Ngifisa ukuthi ngibonge usekelo engaluthola emulini yami kanye labantu abangivotelayo ukuze ngikhethwe ukuba nguMiss Mapressa July 2023. Kangikhohlwa ukubonga inkampani ye-Beauty Spar esingithembise umsebenzi wokuthunga amayunifomu abo.
uMpumelelo
“Ngibonga lalabo abangipha izipho ezehlukeneyo kanye lomnikazi womcimbi uMapressa ngokusipha ithuba lokuba sitshengise amathalenta ethu,” kutsho uMpumelelo.
Uchaze ngohambo lwakhe kusiyafika ngesikhathi ethola isicoco seGlamour and Fashion Show.
“Ngathi ngisizwa uDJ Mapressa ememezela ngomcimbi wakhe ngazitshela ukuthi lonyaka ngizaphatheka kuwo ngaqala ukulungiselela isigqoko sami, ngasithunga ngobunono.
“Ngahamba emcimbini ngingazi ukuthi yimi engizathola indondo yokuba yintombazana egqoke isigqoko esihle.
“Ngathi ngikhethwa ukuba nguMiss Mapressa July 2023 ngajabula kakhulu. Ngethuka futhi ngoba nganginga-kukhangelelanga,” kutsho uMpumelelo.
Uthe ungene kuFashion design ngomnyaka ka2018 eqeda ukwenza izifundo zokuthunga, ngesikhathi eqeda izifundo zakhe wathola njalo isicoco sokuba ngumfundi owenze kuhle ukwedlula abanye wakhethwa ukuba nguPlatform Queen.
