uMthunywa
Ethel Ncube
KWEHLE iyezi elimnyama kwenye imuli eChilonga eChiredzi ngemva kokuba elinye ilunga lemuli le, lithethwe ngamanzi isidumbu sayathokala amanye amalunga omzimba esedliwe zingwenya.
Insibaphenduli le, yenzakale ngeviki ephelileyo lapho umuyi uSebastian Shindi oleminyaka yokuzalwa engu-43 athi echapha umfula ehamba ngomdududu ebholohweni leChilonga umdududu wathathwa ngamanzi.
Kuvele ukuba uShindi laye wacina ethathwa ngamanzi njalo isidumbu sakhe sadingwa amalanga amathathu singabonakali kuthe ngelanga lesithathu izihlobo zathi zisiyakhangela zathola isidumbu singelakhanda lamanye amalunga omzimba okwenza bacabangela ukuba angabe wadliwa yingwenya.
UMthunywa uxhumane lesikhulumi samapholisa eMasvingo uInspector Kudakwashe Dhewa othe udaba olunjalo sebelwamukele.
“Udaba lomuntu owathi echapha umfula umdududu wathathwa ngamanzi sesilwamukele.
“Isidumbu satholakala ngemva kwensuku ezintathu singelakhanda, isandla sokunxele, intamo kanye lamanye amalunga omzimba.
“Enyaweni ubelokhe elezicathulo okwenze uyise watsho ukuba yindodana yakhe uSebastian Shindi.
“Sikhuthaza uzulu ukuba angaqali ukuzama ukuchapha umfula ugcwele,” kuphetha uInsp Dhewa.
