uMthunywa
Thokozile Mbedzi
ZILOKHU zingelankani izakhamizi zesiqinti seFort Rixon ngemva kokuba omunye ujaha ebulewe kuthiwa kathule ngenxa yokuthi ungumyanga kekele abalemali bakhulume.
UBonisani Sibanda oleminyaka engu-23 kutholakale isidumbu sakhe ekuseni ngemva kwengxabano enkulu lamanye amadoda akade enatha lawo nanko phela kubikwa kuvuke umsindo omkhulu wokuba kangakhulumi lutho ngoba ehawula engalalutho, kayekele abalemali bakhulume.
Ekhuluma lephephandaba likazulu omunye wezakhamizi zakulindawo uMnumzana Makubongwe Moyo uveze ukuthi ingxabano ebekhona phakathi kwamadoda la ibingeyombango wokuthi omunye ungumyanga kala lutho ngakho kumele avale umlomo wakhe nxa kukhuluma abalemali.
“Ngilokhe ngingela nkani ngesenzo esenzwe ngamadoda la esokuthi bona ngoba belemali yibo okumele babe yibo abakhulumayo bodwa, kuze kucine omunye esifa ngakhona lokho kuphela. Abantu laba baqala ukuxabana nje ngesikhathi benatha sokuntambama ingxoxo zisitsha.
“Ngokungazi umuyi uBusani wangenela indaba zabo, ngokubaphendula kwahle kwaqala umsindo amadoda la esithi engabokhuluma nxa abalemali bekhuluma ngoba yena ungumyanga, kathule kukhulume abantu kuzwa.
“Kwahle kwavuka umsindo ngakhona lokho ukuthi umuntu odubekayo ngeke akhulume lapho okukhuluma abalemali. Lokhu kunzima sibili ngoba intsha isiziphatha butshapha kakhulu umuntu aze afe kubangwa ukuthi ungumyanga nje kuphela. “Mina labanye bami sahle sazisukela nje sahamba satshiya kulomsindo omkhulu kakhulu abangane babo abanye sebeyithenga indaba le sokuqala ukulwiwa.
“Sathi sivuka ekuseni sezwa kuthiwa kutholakale isidumbu sikaBonisani silimele njalo laye kukhanya wayezama ukuthi azincede kwehlula, ngoba kwakhanya umzila wegazi elalithonta kodwa ngokuswelakala kwenhlanhla kasafikanga khatshana, wawa wahle wafela khonapho.
Ubelimele kakhulu okukhanya ukuthi bamlimaza kakhulu,” kutsho uMnu Moyo.
Omunye wabomakhelwane uNkosazana Sithembekile Nyoni laye uveze ukuthi sebedlela evalweni esigabeni sabo ngoba kuleqembu labafana elihamba lidelela wonke umuntu nje njalo litshaya abantu belimala abanye besifa.
“Sesithwele nzima ngabafana laba esigabeni sethu, bahamba betshaya abantu belimala besiyathungwa ezibhedlela, abanye besifa njengalokhu abakwenza umfana wakoSibanda uBonisani.
“Abafana laba bangamaqembu amabili, laba abanye babencedisa umuyi uBonisani njalo laba abanye yibo abaliqembu eselihluphile esigabeni njalo balutshwana abafana abangala manxeba abo.
“Ngifisa ukuba ngabe bayabanjwa umthetho udlale indima yawo ngoba sebejwayele umkhuba omubi wokuhlukuluza abantu bengelamacala,” kulandisa uNkszn Nyoni.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile wathi solufikile ehofisini labo.
“Udaba lukaBonisani Sibanda otholakale efile eRoyal Bar solufikile ehofisini lethu ngakho sisalucwayisisa,” kuphetha uInsp Ndebele.
