uMthunywa
Pumulani Mpofu
Ekukhuleni kwami ngananzelela ukuba umama uqakathekile kakhulu emulini. Kudala kwakujwayelekile ukuthi ekuthathaneni kwabazali ubaba ayehlala edolobheni kuthi umama asale ekhaya esakha umuzi njalo esondla abantwana.
Umama wayesala ekhulisa abantwana njalo ebagcine ebafundisa umthetho oqinileyo kuthi lapho ubaba esebuya athole umuzi usuvuthiwe.
Lokhu kwakuveza sobala ukubana umama uyisiqokoqela empilweni zethu njalo uyenelisa ukubana athathise abantwabakhe incwadi zokuzalwa eyedwa njalo ulakho ukubakhulisa eyedwa laloba ubaba engasekho njalo azigcine kuze kufike isibanga sokuthi abantwana sebekhulile sebengazimela bodwa.
Indlela omama abazigcina ngayo kwenza uHulumende wabona kufanele ukubana omama baphiwe ilungelo lokuthathisa abantwababo incwadi zokuzalwa laloba eyedwa ubaba engekho njalo isihlobo sikamama silakho ukuthathisa umntwana incwadi yokuzalwa. Kodwa-ke ubaba ngeke akwenelise ukuthathela umntwana incwadi yokuzalwa umama engekho.
Kulezinsuku sokujwayelekile ukubana obaba bayaphika imithwalo. Izikhathi ezinengi omama sebesala bezikhulisela abantwana babo obaba sebehambe baphulula elizweni laseGoli.
Inengi labobaba litshiya abantwana bengakazalwa njalo bengakathathelwa incwadi zokuzalwa. Inengi labomama lisebenza gadalala ukuze bathole ukuziphilisa labantwanababo njalo benelise ukubana bebaphe ikusasa elihle njalo elihlelekileyo.
Kuzathi-ke lapho sevuke ekhumbule ekhaya abuye athole ingane sezikhulile sezibiza umama.
Lapho-ke ubaba sebona ukuthi abantwana sebebiza umama ulakho ukukhipha imali engange $50 aye emahofisini kaHulumende abona ngokuthathiswa kwencwadi zokuzalwa asizwe ukuthi atshintshe isibongo somntwana sibe ngesikayise.
Kule iviki ngithole ithuba lokuxoxisana lodade okuthiwa nguKhanyile ohlala elokitshini leNtumbane.
UKhanyile wayethandana lobhudi okuthiwa nguSibusiso. Bathandana kwabakuhle uKhanyile wacina esezithwele.
Wabuya-ke uSibusiso wazovuma amacala akhe wathembisa ukubana uzakuya eGoli ayesebenza ukuze athole imali yokulobola njalo alungiselele ukuzalwa komntwana.
USibusiso wahamba eGoli waqala esabatshayela ucingo kwaya wacina esethule zwi. UKhanyile wasala ehlezi yedwa waze wabeletha indodana yakhe wazikhulisela.
UKhanyile weza kithi njengogatsha lweTrinity Project Trust ngoba engazi ukubana uyakwanisa ukuthathela indodana yakhe incwadi yokuzalwa eyedwa.
Kuyabe kufunakala i-birth confirmation record, i-health card, lesithupha sikamama.
Ngiloba nje uKhanyile wenelisa ukubana athathele indodana yakhe incwadi yokuzalwa. UKhanyile uzimisele njalo ukuthi indodana yakhe ibe lekusasa elihle ngoba usefundela umsebenzi ozamupha imali yokugcina umntanakhe.
Bomama lingakhathali nxa lingatshiywa ngobaba njalo lihlale ligcine abantwabenu kuhle libalungiselele ikusasa labo.
Siphinde njalo sihlangane ngeviki elizayo.
Umlobi uthinteka kukheli elithi [email protected] loba kunombolo ezithi 0773195055 laku www.trinityproject.biz
