uMthunywa
IMPILO yokujabulisa abanye abantu ibuhlungu kakhulu ngoba ayehlukananga lakancane lobugqili.
Kulusizi ukuthi kulabantu abachitha isikhathi sabo bedinga indlela zokuthokozisa abanye abantu, umuntu aze azitshintshe indlela adalwa waba yiyo yona nguMdali ngoba ezama ukuthi athokozise ingabe amukeleke kwabanye abantu.
Kulezinsuku amanina amanengi asethethwe ludumo lokuba ngama-yellow bone.
Abantu bagcoba lokhu lalokhuyana ngoba nje befuna ukuthi babe mhlophe.
Okudanisayo yikuthi kuzozonke izizatho zokusebenzisa amagcobo kunye lamaphilisi la esimqoka yikukhanga lokujabulisa abesilisa.
Kulusizi ukuthi abantu besintwana bazithola sebegqilaziswa yikuthanda ukubonakala, abantu baze bacine besenza ezinye izinto ezibeka impilo zabo engozini nanko phela amagcobo la abawasebenzisayo alama-side effects abalisela ukuthi ngokuya kwesikhathi ungaba kungozi yomgwaqo nxa kungadingeka ukuba uthungwe ijwabu lakho liyabe lingasavumi ukuthi kwenziwe lokhu.
Pho ukuba mhlophe lokho kusiza ngani njengoba kungekho okwaziyo ukuthi kusasa kungenzakalani empilweni yakhe.
Okunye okuzwisa usizi yikuthi amanye alawo mafutha lamaphilisi abawanathayo awafanelanga ukunathwa ngabantu.
Nxa umuntu esegula abesebiza amaloyo yena kunguye oziloyayo ngokuthanda izinto.
Kwesinye isikhathi abantu bayazilimaza ngenxa yokuthathwa ludumo lwezinto abangela qiniso lazo.
Okusuka kudanise yikuba amadoda e-Africa yiwo abafuqa kakhulu abesifazana abansundu ukuthi baze babone kungcono ukuthi baphendule imbala yabo ngoba bebona angathi bahahabela bona kodwa lanxa kunjalo kuqakathekile ukuthi abantu bakwazi ukuthi amagcobo lamaphilisi okwenza lokhu kawakho emthethweni kuleli kungakho ungatholakala ulawo uyabotshwa.
Kuqakathekile njalo ukuthi abantu baphile impilo zabo hatshi ukufuna ukuba ngabanye abantu ngoba inengi labesintwana lezinsuku lifuna ukuba njengabosaziwayo laba abaphuma kumabonakude.
Abanye bafuna ukuba njengabo okokuthi umuntu uvele ephulele izigodo endlebeni angabesezwa lanxa eboniswa ngengozi ezingamphambanisela impilakahle yakhe.
Lokhu kuzitshintsha kwabesifazana kuyisibonelo esibi ebantwaneni abasakhulayo ngoba nxa bebona onina besenza lokho ngeke bekele ukulandela ngoba becabanga ukuthi kuyinto eqondileyo.
Kungumbono kaMthunywa ukuthi labo abafuna ukuba ngama-yellow bone benze njalo ngendlela ezisemthethweni ukuze bangafaki impilo zabo engozini.
Amapholisa lawo angaba lusizo kakhulu nxa engahlasela abophe bonke abathengisa amagcobo la okungekho emthethweni ngoba befaka impilo zabantu engozini.
Phezu kwakho konke kuqakathekile ukuthi abantu basuthiseke ngendlela abadalwe baba yiyo ukuze bangacini bezilimaza, bacine sebeyinhlekisa bona bedinga ukubonakala.
