uMthunywa
OMAMA balakho ukuzithuthukisa ngezindlela ezinengi njengoba nje kulezinsuku sebengaba-fundileyo, abazisebenzelayo njalo abalakho ukuzinakekela.
Akusadingakali ukuthi umuntu ongumama athembele kumkakhe ukuba abenguye omnakekelayo kunye labantwabakhe. Phela umama walamuhla uselakho ukukhetha ukuthi ufuna ukusebenza kumbe ukusungula eyakhe ibhizimusi. Lamuhla imizi isiphethwe yibo bonke abazali hatshi ubaba yedwa ngoba umama laye uvuka engoqonda emsebenzini wakhe kuthi ke umkakhe alubhekise kowakhe umsebenzi.
Izinto sezaguquka azisafani lakudala lapho omama abanengi babengabasala ngekhaya bekhangela abantwana kanye lemizi yabo.
Lamuhla akula muntu ongumama ongakhalakhala ngokuthi yena akala nto ayenzayo ukuze alethe laye imali yokuphathisa ekondleni abantwabakhe ngoba phela iyafuneka emizini yonke. Omama bakhathesi sebelakho ukuzikhethela yiloba yiphi into abafuna ukuyenza njalo singakhangelisisa lamuhla sizathola ukuthi omama abaselakho ukwesaba ukungena kwezamabhizimusi kumbe ukuzisungulela awabo amabhizimusi.
Sithola ukuthi abanye sebengaba lezitolo, indawo zokulungisa inwele, izigayo, amakhefa kanye lokunye okunjeya njalo inengi labo selingelaba phumelelayo okokuthi seliletha imali eyedlula eyamadoda akwabo.
Lokhu kuyinto ekhathaza amadoda amanengi ngoba engathandi ukukhanya esengaletha imali encinyane kuleyomfazi njalo esikhathini esinengi amadoda la asuka abe ngafuna ukukhokhela amabhizimusi asungulwa ngabomkabo. Kodwa akumelanga kube njalo ngoba uma umama lobaba bethandana lokhu okuzuzwa ngoyedwa akulamnini emzini wabathandanayo, kusuka kube ngokwabo bonke.
Omama abanengi balaso isifiso sokubana babelawabo amabhizimusi kodwa basuka bathanda-buze lapho becabanga ukuthi bazoyigebha ngaphi imali yokusungula lowomsebenzi.
Yebo, kuliqiniso ukuthi imali seyaba yisiqokoqela kukho konke esifisa ukukwenza loba ukukusungula kodwa ke kumele omama basebenzise ingqondo njalo bahlanganise amakhanda ukuze bathole amacebo ezindlela abangathola ngazo imali.
Bangakwenza lokhu sebengaqoqana babe ngamakopa kumbe inhlanganiso ezithize ukuze bayekweboleka imali bayisebenzise ngendlela ezabalethela inzuzo ephezulu. Kulendawo ezitshiyeneyo lapho abangathola leyo mali kodwa phela imali le ayiphiwa umuntu mahlayana nje, kumele aqale atshengise ukuthi iphurojekithi yakhe izaletha inzuzo. Konke lokhu kumele akulobe phansi. Uzatshengisa ke ukuthi uzawuqhuba kanjani umsebenzi wakhe, ayisebenzise kanjani imali azayiphiwa aphinde njalo atshengise ukuthi uzayibisela kanjani leyo mali.
Kulamankampani atshiyeneyo kanye lamabhanga aboleka abantu abafisa ukuqala amabhizimusi amatsha imali njalo zikhona ezinye indlela umuntu angathola ngazo leyo mali.
Okumqoka yikuthi umuntu azi ukuthi uvele ufuna ukwenza ibhizimusi yomhlobo wuphi, abesedinga indlela zokuqala ibhizimusi leyo ngendlela ezakwenza ukuthi umsebenzi wakhe uqhutshwe kakuhle acine esengolenzuzo ephezulu.
Konke lokhu angakuloba phansi abesesiyacela imali ebhanga kumbe azimisele ukuthi uzayisebenzela ngokwakhe leyo mali, ithi ke ingaba nengi abeseqala ke ibhizimusi afuna ukuyiqala.
Abazenzela imisebenzi yezandla bathi umsebenzi wabo uqhubeka kakuhle kodwa nje into ebabuyisela emuva ngeyokuthi abayitholi imali yokuqhelisa umsebenzi wabo. Balesifiso sokubana baqhelise umsebenzi wabo baze bafike kubanga lokuba lezitolo lapho abangathengisa khona impahla zabo kodwa bathi abamabhanga ababaniki leyo mali.
Uma kukhulunywa ngabesifazane lezenotho kumele sihle sikhumbule abafazi abakhaliphele amabhizimusi. Inengi labafazi laba ngelazi indawo ezinengi njalo ezikhatshana ezinjenge Dubai, South Africa, China Botswana leZimbabwe lapho abagijima besiyawoda impahla etshiyeneyo bezokuthengisa kuleli. Abafazi laba bakhuthele njalo balesibindi njalo bangaphiwa ithuba banikwe imfundiso bebanengi mayelana lezamabhizimisi bangaphumelela.
Okudingekayo yikuthi baqinisane njalo bakhuthazane kuzo indaba zamabhizimisi.
Ukuze baphumelele omama laba kumele baqale bafunde ukungeyisi imisebenzi yabo yezandla, yokuthengisa ngoba yiyo engabalakho ukubanceda ngokubapha imali enengi kakhulu. Okwesibili kumele bakhululwe engqondweni yokuthi “mina ngifanele ngigcinwe, kumele umkami abenguye ongigcinayo labantwabami”.
Umuntu ongumfazi kumele abengo zisebenzelayo ngoba nxa ungela mali awuzethembi futhi akulamuntu okulaleyo. Kulesaga esithi “Ulwazi lomuntu ompofu luyeyiswa”. Imali yenza umuntu abelamandla ngakho ke, abafazi kumele babumbe amaphurojekithi lamakopa azabanika imali. Ezikhathini ezinengi omama basebenza nzima, ebusuku lemini begijima besiya le lale bezama ukudinga imali.
Kungajabulisa kakhulu uma omama benga-bolekwa izimali ukuze baqalise amabhizimusi ngoba imisebenzi yohlobo lolu ilemali enengikazi. Okuludubo yikuthi inengi labantu alazi ukuthi lingaqonda ngaphi uma lifuna imali ebolekwayo.
Kumele labo ababoleka abantu bamabhizimusi amancinyane bahambe befundisa omama ngendlela abazisebenzisa ekwebolekeni leyo mali kanye lokuthi kufunakalani ukuze umuntu ayithole leyo mali.
Inengi labomama selingelatshiya imisebenzi ngenxa yokuthi lananzelela ukuthi lingenza imali enengi ngamabhizimusi abo. Lokhu kuyinto eyesatshwa ngabantu abanengi ngoba bethi kambe kungasuka kube njani uma ibhizimisi lingabhidlika kodwa kulabo abalezibindi kusuka kube yinto elula ngoba bezethemba njalo besethemba ukuthi amabhizimusi abo azabapha inzuzo ephezulu.
Abafazi kumele bazi ukuthi labo bakhaliphe njalo balamandla alingana lawamadoda kanye lokuthi akusicala ukuthi benze imali yabo kumbe banothe ukwedlula omkabo.
