uMthunywa
Ophezulu Stinta
Kugwalo lwethu oluqukethe izindaba ezimfitshane kuleliviki sizakhangela indatshana elesihloko esithi Isinqumo.
Lapha sinanzelela isihloko lesi kungathi kukhona isinqumo thize isiphetho sento ethile okumele senziwe. Lapha njalo sihlangane lomlingiswa othize okuthiwa nguMbhoshongo.
Kukhanya uhamba edliwa yimicabango ethile eqonde ngasekhaya. Uyethuka lapho esenanzelela ilembu elimhlophe nke elaliphephephezela egumeni. Kucaca ilembu leli yinto ayezayithini leyo, uyazihudula eqonde kulindawo yelembu elimhlophe nke okusobala ukuthi yindawo yesonto.
UMbhoshongo wayeyizwa icacile ingoma eyayisitsha kuleyondawo. Wake wayizwa ngesikhathi emenywe nguNgobese umnunzane ababesebenza bonke. Wayengazimiselanga yena ukuyangena endlini yesonto kodwa ngendlela uNgobese amncenga ngayo ukuthi nje ayezibonela ukuthi babekhonza njani ukuze azikhethele yedwa athathe isinqumo eseyedwa ngokukhonza lokhu.
UMbhoshongo wacina ehambile, lapho-ke wafika wathola intshumayelo okwakungathi yayivele ihlose yena uqobo lwakhe. Umtshumayeli wagcizelela kakhulu indaba yokutshiya izono kungakhathelekile ubunandi bazo. Ingoma lazo zamthinta ngaphakathi waze wafisa ukuthi abe yingxenye yalaba bantu abaphethe indaba ezimnandi kangaka.
Ekufikeni kwakhe endlini wafica uMpama insizwa yangakibo ingagqize qhakala nje.UMpama wambuza-ke ukuthi wayevela ngaphi okucaca ukuthi wayeke wamdinga wangamtholi. Inhloni zamgcwala uMbhoshongo ukuthi azichaze ukuthi yena wayevela emvuselelweni wenkonzo. Wabona kungcono ukuthi aqambe amanga ngelithi ubeselula inyawo ngengejaha.UMpama ke wamncoma kakhulu emxhawula isandla laye engasaqondisisi ukuthi kuyini lokhu okungaka ayekwenzile.
UMpama waze wamhlubela indlubu ekhasini emazisa ukuthi ekhaya wayetshiye injabulo iphezulu kugiywa, kumnandi. Kukhanya intombi yesigabeni okuthiwa nguGeziphi yayilethe isibonakaliso sothando lwayo kuMbhoshongo. Uthi uMpama “uGezephi ubelethe impahla”, yiso-ke isibonakaliso sokwamukela uthando lesi.
Laye uMbhoshongo kazange enelise ukuzibamba esizwa indaba ezinjalo kakwazanga lokuchaza injabulo ayeyizwa ngaphakathi, okwaze kwenza lokuthi angamuzwa uMpama esevalelisa. Wayelokhu ethwele isithombe sikaGezephi esibuka esiphenduphendula. Wayesekhathazekile ukuthi pho emsebenzini wayezalithola nini ikhefu lokuthi ayebona isithandwa sakhe azibongele mathupha isicelo esize semukelwa.
