uMthunywa
YiNtatheli kaMthunywa
LOBA sekutheni, kuyazikhanyela ukuthi iqembu leTsholotsho FC liyavalelisa kuligi yenguqu ephakemeyo kulisizini.
Ukusadalala kwaleliqembu sekufike emaphethelweni ngoba imiklomelo yayo kungalane yeCastle iveza ukuthi okwalithimu sekwehlule.
Ukungena kweTsholotsho FC ngo2015 kwaletha injabulo kubalandeli benguqu ilizwe lonke. Khathesi selizwisa usizi.
Ihlezi kunombolo yesi-15 kungalane iphethe imiklomelo engu-19 kumidlalo engamatshumi amabili lanhlanu.
Imidlalo emihlanu eseleyo iza lemiklomelo engu-15, okutsho ukuthi nxa iTsholotsho izimisele ukubambelela kuligi yePSL kuzamele inqobe imidlalo yonke.
Kumidlalo le iZiqholo zeZhwane zizadlala lezitshisayo iHighlanders, iNgezi Platinum, iChapungu, iBulawayo City leFC Platinum kuligi yeCastle. Okutshayisa ithimu le ngomoya yikuphatheka kwayo kuqhudelwano wenkezo yeChibuku. Ngomnyaka ophelileyo ngesikhathi esifanayo, iZiqholo zeZhwane zazidlalela endaweni efanayo kulogu, okuchaza ukuthi iqembu leli alikaphakami kumdlalo wenguqu wesigaba saphezulu. Ngaleyo sizini iTsholotsho yasinda kancane ukhitshwa kuligi.
Umqeqetshi wayo uLizwe Sweswe utshele iphephandaba likaZulu ukuthi kethuki lutho ngoba ulabadlali abangamasotsha, abazi ukutshintsha izinto.
“Angivumi ukuthi siyaphuma kuligi yePSL. ITsholotsho iseselethuba lokukhwela. Imidlalo emihlanu eseleyo ingaguqula izinto njalo abadlali engilabo bayathembisa ukwenza ngcono ukuze iqembu ligcine indawo yalo.
“Udaba lokuthi sizaxotshwa kuligi asilucabangi ngitsho. Nxa udlala inguqu akumelanga ucabange ngokudliwa.
Abafana bami ngibatshela ukuthi sizanqoba kuphela,” kutsho uSweswe.
Amazwi kaSweswe engabe eqinisa abadlali kodwa abalandeli beqembu lakhe abakuboni kunjalo. USweswe uthe iqembu lakhe sokumele likhwince amabhulugwe.
“Angeke ngithi sesilahle imbeleko okwamanje. Kungaze kuthiwe sesitshiywe yisikhathi sokuthi sithole imiklomelo, mina angikuvumi lokho.
“Ukuzimisela kwabadlali kanye losekelo lwabalandeli yikho okusifikise lapha. Umncintiswano uyaqhubeka ngesigaba sesibili seligi yethu, lokho kutsho ukuthi sizaqhubeka ngegiya elifanayo,” kutsho uSweswe.
USweswe uqhubekele phambili ngokuthi iqembu lakhe lilomlandu omkhulu kuligi le njalo abalandeli balo akumelanga bakhathazeke ngoba amacebo okuthi lingaphumi kuligi alokhe ekhona.
“Maviki onke silungiselela imidlalo yethu ngokugcweleyo njalo sikhangelele ukunqoba kumidlalo yethu ezayo,” kuqhuba uSweswe.
USweswe ukhuluma elokuzitshaya isifuba kulandela ukufinyelela kwakhe ihlandla lama-quarter final enkezo yeChibuku.
Kulinkezo iTsholotsho ingqikilana leNgezi Platinum.
