uMthunywa
Ophezulu Stinta
SIKHANGELA indatshana elesihloko esithi UBhuku. UBhuku ligama lesizulu elitsho udaka, kucaca ke ikhona indaba esegudwini ngodaka lolu. Sizibuza imibuzo eminengi ngodaka lolu. Sizibuza ukuthi kuyini okwenzakala kulo njalo lwaluvele lungaphi.
Sihlangana loMashezi ephakathi kobuhlungu ekhophoza izinyembezi ekhophozela indodana yakhe eyayisileminyaka emibili ingaziwa lokuthi yayingaphi ingazikhathazi nje lokubhala ukuthi azwisise ukuthi ekhaya unina kanye lenkosikazi yakhe babephilile na. Okuyikho okwakuyidabula ngamandla inhliziyo kaMashezi yikuthi yena uMfiliji nguye inhloko eyayiletha ukudla lapha ekhaya kukhangelelwe kuye konke. Pho kwakuphilwa njani ngesikhathi eseginywe ngumhlaba.
Laye uMfiliji indaba yokunyamalala kwakhe yayingamphathi kuhle ngoba uyazama ukududuza unina emethembisa ukuthi njengoba wayesebuyile ekhaya wayesezovusa umuzi abagcine njengenhloko yomuzi abanakekele kukho konke ababekudinga. Ekufikeni kwakhe lapha wayelokhu engakamboni uMashandu inkosikazi yakhe lengane yakhe, ngoba uMashandu lo wamtshiya ekhulelwe pho kazi umthwalo lowo waphetha ngani. Unina kazange amphendule kodwa ke wayelokhu emthela ngezinyembezi okwake kumethusa laye uMfiliji esecabanga ukuthi kukhulu okwakuzalandela lezi zinyembezi. Ngalesosikhathi uMashezi wayesetshaywa luvalo lelizwi selivevezela.
“UMashandu akasekho mntanami,” ngamazwi avela kuMashezi ephendula indodana yakhe. Lapho kazange alinde nje khona lokuthi unina aqedise inkulumo yakhe kuye uMfiliji kwahle kwacaca ukuthi uMashandu wabhubha khona ngesikhathi ebeletha. Wayeseginqe semanzi uMfiliji.
UMashezi wabuye njalo wamthela ngemibuzo uMfiliji lo owayelokhu ecela unina ukuthi amchazele ngokungabi khona kuka Mashandu, wayesitshoni. Wayesefutheka ngolaka ke lapho uMashezi embuza ukuthi yayizohlalelani ingane yabantu uma usuyishiyile wena?
Lapho wehlisa iphika uMfiliji sekumcacela ukuthi unkosikazi wakhe lo kusobala wahamba hatshi elokufa leli ayeselicabanga. Wezwa kungathi kukhona okwehlayo esifubeni wasebuza ke ngengane ukuthi pho yona yayingaphi.
Kodwa phezu kwakho konke wayefuna ukuhlangana loMashandu azicelele yena mathupha uxolo.
