uMthunywa
Ophezulu Sthinta
KULELIVIKI siqhubeka ngendatshana elesihloko esithi uBhuku. Ngolimi lwesiNdebele uBhuku ludaka olutshonayo okokuthi umuntu engabhajwa phakathi kwalo kunzima lokuphuma kulo. Lapha ke sisondeza isihloko lesi endatshaneni sesingakhangelela uhlupho thize olumelwa ludaka lolu oluyisihloko sendatshana.
UMfiliji wayesezimisele ukubuyisana lenkosikazi yakhe.Ngesikhathi esifanayo wayekhathazekile ngengane ezidla yedwa okofudu ezibuza ukuthi pho iyaphila na. Unina wamazisa ukuthi ingane yakhe yahamba lonina yayizasala ngaliphi ngesikhathi unina esebuyela kibo, wabuya njalo wabika indaba edabula inhliziyo ukuthi ingane yayingaphilanga kuhle ngenxa yokuswela ukudla okulesondlo.
Wazimisela ukuyadinga abantwana bakhe uMfilijii lalapho uMashandu esazame ukuphosa amabili kungathi yayikhona indaba ayefisa ukuyazisa indodana yakhe ingakaze iyelanda abantwana bayo, wayesejahe lokuthi ingane le eyayibikwa kabuhlungu ngokungaphili kuhle iyekwelatshwa kusesemasinyane. Wayingena indlela eqonda ebukhweni bakhe lakhona kwakungumango ukuya lapho. Wayehamba ngesiqubu somvundla sengathi wayexotshwa yizinja. Lapha uhaluzela nje wayehamba ehlela ngekusasa lakhe lomdeni wakhe. Kwakukuhle nje ngoba wayesethole umsebenzi owawumbhadala ngeholo elithe xaxa, laye wayesizwa nje ukuthi uzovusa umuzi.
Laselimathunzi esehaluzelela ukufika labo besakhangele ebukhweni bakhe. Wadlula ke endaweni eyayilodaka olutshonayo, lwalukhona ugodo olwalunqunyiswe lapho ukuze odlulayo adlule phezu kwalo kodwa lalolo godo lwalungasizi okungayini. Wachapha lapho esetshaywa luvalo esecabanga ukuthi wayezakuthini umkakhe esembona ethutsha nje.
Wazibona esefikile laye engananzelele wethuswa yizinja. Kwathutsha okungumfananyana kwamxotshela izinja waqonda lapho okwakuhlezi uninazala khona. Okwabuya kwamsinda yikubona isalukazi esinguninazala simbingelela ngezinyembezi, uMfiliji wazama ukuzixolisela ebika lonke usizi ayelalo ngalokho ayekwenze ngaphambilini. Uninazala wabuye njalo wamthela ngombuzo othi kambe kwakuzolunga yini. Wamdida uMfiliji lowombuzo.
