uMthunywa
Ophezulu Stinta
Siqhubeka ngendatshana elesihloko esithi Iso ngeso. Sitshiye uMabaso ethule indaba ezibuhlungu emzini wakoZuma. Kwaba yisikhathi esinzima kakhulu kuMaNdaba, watshiselwa waginqa wabamanzi te wasukuma wayadinga amanzi aqandayo ngenhloso yokwehlisa iphika. Isimo ayesekuso sasizwisa ubuhlungu.
Kwakunzima lakuZuma ukubona umkakhe ekulesisimo, wehluleka laye ukuzibamba wezwa inhliziyo yakhe itshona amazwi enelisa ukuwakhupha ngomlomo wakhe ngathi “Ngizombulala uViljoen.” Inhliziyo yayikhalela ukuziphindisela ngokubulawa kwendodana yakhe kabuhlungu kangaka. UMabaso njengendoda ehlose ukwakha ngoxolo hatshi ngokulwa langolaka wazama ukubonisa umngane wakhe ukuthi ingxaki kazixazululwa ngaleyondlela. Uzuma umphendula ngesihloko sogwalo uthi “iso ngeso Mthungwa.”
Lapho egcizelela ukuthi umlibhe ngokufa ngakho laye kumele aphindisele ngesifananayo. Kulapha esithola khona ingcazelo yesihloko esithi Iso ngeso sinanzelela ukuthi uphindisela ngalokho otshaywe ngakho. uViljoen wabulala indodana kaZuma yikho nje laye uZuma ethi uzambulala ukuze abhodle.
Besankeme imilomo lapha endlini uZuma ebila ngolaka wathi lothu wangena endlini waphuma esethwele inkafula kufa. Wayesezimisele ukuyacaphaza ubuchopho bukaViljoen kuhle kuphele ngaye. uMaNdaba wayengavumelani laso lesisenzo wazama ngazo zonke indlela ukubonisa umkakhe lo ukuthi kwakungasiyo ngitsho indlela yokuxazulula indaba efana le. uZuma wayesesidla inja lapho. Sinanzelela indlela akhuluma ngayo loMaNdaba esithi angabe wayefuna ukwendlalela uViljeon na okutsho ukuthi laye amhlakaze ngenkafula kufa leyo.
Esikunanzelelayo lapha yikuthi abantu balakho ukuthatha izinqumo ezithile befuqwa yimizwa yolaka kanye lokucaphuka. Kulapho umuntu azithola esenze isenzo esibi ngenxa yokuthi umcabango usugajelwe lulaka.
Waphuma ngolaka uZuma efuqela uMaNdaba kude le. Waya endiza egarajini wangena emoteni yakhe ngesikhulu isiqubu.Ngokuphazima kwelihlo wayesendiza ngendledlana ezincane ekhanda lakhe lapha wayesesizwa iphimbo likaNkululeko liduma ekhanda lakhe. Zehla izinyembezi zajuluka ngesifuba. Wazibona esethutshele esontweni lapho ayesebingelelwa ngabantu ababemazi loba nje amehlo akhe ayengaboni lutho yena wayesevele esethe nhlo emangcwabeni ayengemuva kwendlu yesonto. Wayihambisa kancinyane imota yakhe wangena entubeni lapho afika aqonda ngqo ethuneni likaNkululeko wafika waguqa lapho walikhangela ethule zwi.
