uMthunywa
Ophezulu Stinta
Silokhu siphezu kwendatshana elesihloko esithi Isinqumo. Ngeviki edlulileyo sitshiye uMbhoshongo esefike ekhaya lapho ayesezibonele ngawakhe amehlo isipho lesibonelo sokwamukelwa kwenhliziyo yakhe ngu Gezephi. uBachazile ubuya njalo akhiphe enye impahla egoqelwe kuhle atsho njalo ukuba yeza leqhiye leliya elalikholiphephezela egumeni. Lapha-ke kwakuyithawulo yokugeza, amagcobo kanye lesepa yokugeza.
UBachazile wamgaxa ithawulo lelo ngokwesiko ukuze kubonakale lakubani nje ukuthi insizwa yayisiqonyiwe.
Konke lokhu kwenzeka nje uMbhoshongo katshengisi ukuchelesa, kabonisi njalo kavumelani lenjabulo elapha ekhaya ngokuthandwa kwakhe. uBachazile wayekunanzelela konke lokhu wakubona kufanele nje ukuthi abuze ukuthi kuyini lokhu okumenza angathokozi. Umbhoshongo-ke yena wavele wala ngelokukhathala, ethi umzimba wakhe udiniwe njengoba umango wegoli umude kangaka. Wamkhuthaza-ke ukuthi into eyayizamsiza yikuthi ayebona uGezephi. Kwakubuya kumsinde njalo ukuthi udaba lwakhe wayezalwethula athini, wayesezimisele nje ukungabuyeli emuva ngesinqumo sakhe. Inhliziyo yayisivele yazikhethela kungasela kubuyela emuva esemjamele embuza engacwayi ukuthi njengoba esekhethe eyobukholwa nje utsho ukuthi laye sekumele abelikholwa.wayekuthandabuza lokho ukuthi uGezephi wayengabalikholwa.
UMbhoshongo uzibona ephakathi laphakathi kuka Gezephi loNgobese. Pho uzadanisa bani ajabulise bani nxa sekunje? Uphakathi kokuzidla ngomcabango. Empilweni-ke sifunda ukuthi umuntu angazithola esesigabeni esifana lalesi, kuqakathekile ukuthatha isinqumo umuntu enze ulutho olufaneleyo alubona lulenzuzo ebambekayo mayelana lempilo yakhe, kungakhathalekile ukuthi ubani uzajabula kumbe uzakhubeka ngesinqumo esikhethiweyo. Yisifundo esiqakathekileyo ukuqathanisa imibono kodwa isiqokoqela sendaba sikuwe wena mnikazi wendaba.
Wazidonsa uMbhoshongo esesiya esikolo lapho okwakulomvuselelo wesonto khona elokhu ebindana lemicabango. Lapho efika wayizwa njalo ingoma iduma lendlu yona kanye eyanguqulela esontweni. Ilizwi elalihlabela ingoma le lathanda ukumethusa, wayengathi kazwisisi kuhle. Wasondela waze wangena lakanye wayengalahlekanga, uGezephi nguye owayecula emi kulabo abasebekhethe indlela yokukholwa. Kwaba yinjabulo enkulu ephezu kukaMbhoshongo lapha. Yisifundo njalo ukuthi empilweni ungehluleli ungazange udingisise kumbe ufike esimeni esithile ngoba umbono wakho ungaphanga ube yize nje.
