uMthunywa
Ophezulu Stinta
Siphezu kwendaba elesihloko esithi Isinqumo. UMboshongo uphezu kokuzibuza imibuzo ukuthi pho wayezalithola nini ikhefu emsebenzini ukuze ayephumula abe lethuba lokubonana lentombi le eyayimthumele isipho sothando. Elokhu ezidla ngemicabango nje ehlezi yedwa kwangena uNgobese yena owayezobonga ngokuvakatsha kukaMboshongo esontweni. Wayejabulile kakhulu ngalesi senzo ayesincoma ngempela njengoba umngane wakhe wayetshengisa impawu zokuthakazelela ezesontweni ngendlela ephezulu.
Indaba esuka ixake lapha yile eyokuthi lapha ecabanga ngendaba yesonto ufikelwa luvalo ezibuza ukuthi indaba yokuba likholwa uzayithini yayimkhathaza lasekuthini intombi enguGezephi yayingeke imqome lapho isizwa indaba ezifana lalezo, uMboshongo aze abone kungcono nje lokuthi uGezephi athathwe ngezinye izinsizwa engaphumputhi ukuthi uGezephi nje wayengeke aze ayimele indaba yekholwa. Wahamba elokhu ezidla ngaphakathi lapho afika abona khona iqhiye iphephezela egumeni okuyisona sibonelo sentombi lapho ithe yazinikela ejaheni.
Ngesiko lesizulu ijaha lalizibika entombini kuthi intombi ingavuma yayingalitsheli ngomlomo, ebusuku yayibophela ilembu elifana leqhiye entubeni yomuzi ijaha selizakwazi ukuthi isicelo sothando samkelekile. Lokhu kwakumethusa ngamandla wethuka lalapho esebingelelwa ngunina. Unina-ke yena wayejabule kakhulu esajabulela indodana yakhe, babengakukholwa njengomdeni ukuthi ngempela kwasekwenzakele.
Unina kaMboshongo wayengasakwazi khona nje lokuzibamba wayeselokhu emxhawula njalo nje eveza injabulo yakhe. Wayeseze ebuka lentokazi yabantu ebabaza ubuhle bayo, sekumphuzele lokuthi azohlala kuloluthango.
Ngesikhathi esuka emsebenzini wayeyazi indaba yakhe lo Gezephi.
Ngesikhathi eselapha ekhaya indaba yayimsinda sekungathi zindaba ezintsha kucaca indaba yesinqumo sesonto yayiyiyo ehluphayo lapha ekhaya. Kuyaxaka ke ukuthi yindaba indaba le imhlupha kangaka lapho sekungena isinqumo sobukholwa.UMboshongo uzibuza yedwa ukuthi abomuzi babezakuthini. Akulanto embi ngokukholwa kanti pho okwenza eyakhe indaba imkhathaze kangaka kuyini?
UMnawakhe uBachazile laye umbingelela ngazo indaba ezimnandi loba nje yena uMboshongo esenza sengathi kaboni okuhle kizo. Kuhle lapha ekhaya uBachazile laye ubuya abuke ngelikanina ukuthi ngempela umnewabo wayeqomile hayi into yokudlala.
