uMthunywa
Ophezulu Stinta
Siqhubekela phambili lendatshana elesihloko esithi USifundo. Ngeviki edluleyo uGugu simtshiye ekhathazekile kakhulu esezimisele lokuquma umtshado wakhe loMusa lapho ezibona engathembekanga.UMusa wayesembuza ngelengwenyama, ukuthi kuyini ngempela okwakumenza athwale imithwalo. UGugu wayesengusibindi gidi engasesabi ngitsho ukudliwa yilelibhubesi ayebhekene lalo.
Wacela nje ukuthi amlalele alandise isisusa sendaba.Ngesikhathi ephetsheya kulapho uGugu alingeka khona loba nje wayezama ukukwenza kube yindaba elula ezigeza ngelokuthi kwakulilanga elilodwa.
Ekuphambukeni kwakhe lapha yikho azithola esekhulelwe. Yindaba ayezayiphatha njani-ke leyo ngoba uMusa wayeseleminyaka emibili engekho.
Abantu babezababaza bebabaze umhlolo ongaka. Okunye okwakunzima ngendaba yakhe yikuthi kuleyo yunivesithi ayekuyo wayesanda kuthola umsebenzi okwakungamxotshisa ukubonakala esekhulelwe ilanga lingakatshoni.
Wayelokhu elandisa uGugu loba nje uMusa yena wayesegane unwabu. Watsho-ke ukuthi kwakungelamuntu owayengamephula kuloludaba.
Wacabanga waze wathatha isinqumo sokuthi ayekhipha lesosisu. Elandisa nje umfanekiso welanga eliyisithutha uvuka ucace emcabangweni wakhe. Kulapho ayekhona emzini wesalukazi esasingamsiza ngokususa umntwana lo.
Wawubona umfanekiso wesalukazi sithwele inkonxa thize siyibeka phambi kwakhe ngelithi kumele anathe umuthi lowo. Emuva kokunatha kwakumele akhwele embhedeni kulapho ayezazijanqula khona sekusebenza umuthi wesalukazi.Isalukazi sagcizelela ngelikhalimayo ukuthi umuthi lowo okwakufanele uGugu awunathe wawubaba gamu, sasingekho isikhathi sokudlala lapho. Isalukazi sasizitshaya isifuba, lapho-ke ngesikhatshana umuthi uyichitha inkonyane ngesikhatshana nje kubesekuyimbali edlule kudala.
UGugu wathula ezidla ngemicabango kwabanzima khona lokuthi anathe umuthi lowo.
Wayesezibuza njalo ukuthi nxa ethi kusasa nje uzabe esengokhululekileyo utshoni ngalokho. Wayezakhululeka njani esengumbulali.
Unembeza wamqinela ngelithi wayengayibulala njani ingane yakhe. Isalukazi sangena-ke lapho ngethemba lokuthi sasesizoqala umsebenzi lapho uGugu wayesetshintshe umqondo. Lapho isalukazi samxotsha ngelithi wayezomdlalisela isikhathi.
