uMthunywa
Ophezulu Stinta
Siqhubeka ngendatshana yethu elesihloko esithi USifundo. Sitshiye uGugu esephakathi kwesikhathi esinzima kakhulu ngemva kokubona umfana okuthiwa ngusifundo owayezihlalela ezitaladeni nje engumhambuma ephila ngokukhongozela kanye labangane bakhe.
Simbona uGugu esehlisa inyembezi ethi ngempela nguye uSifundo okuchaza ukuthi wayemazi kamhlophe umfana lo. USifundo laye wayenanzelela lokhu kwenza okungajayelekanga, laye kwaze kwamlethela ukukhathazeka emoyeni.
Lapho siqhubeka loGugu simfica esezibuza imibuzo ayiphendule njalo ngeminye imibuzo kuyabindana lapha ekhanda. Ukhathazwa yikuthi pho indaba enje wayeyibeka kanjani ukuhlangana kwakhe lo Sifundo lo. Elokhu ephakathi kokutshayela kufika kuye umcabango welanga angasoze alikhohlwe empilweni yakhe.
Ufikelwa ngumcabango welanga evakatshela udokotela ngoba ezizwa engaphilanga kuhle. Udokotela wazethula indaba zembangela yokungaphili kuhle loba nje kwakungasindaba enzimnandi udokotela wamazisa ukuthi wayekhulelwe. Ugugu wayengakulindele lokho ngoba kwakuzindaba ezazixabanisa loba nje zitshabalalise uthando lwakhe loMusa owayemthanda okwamagama.
Esazidla emicabangweni lwakhala ucingo lukaGugu. Waludobha ucingo lolu ezidonsa engalawo amazwi, engelawo futhi lamandla okukhuluma. UMusa nguye owayetshaya ucingo emazisa nje ngothando lwakhe. Lapho-ke ikhanda likaGugu laduma ngamandla.
Wayezaqala ngaphi emuntwini omthanda kangaka. Ngakwesinye isandla wayezathini ngengane yakhe le ephila kanzima kanje, yena esidla amabele.
Watotoba waze wayafika ekhaya lapho afica khona uMusa engakafiki. Wangenisa imota egalajini waqonda endlini.
Wayibuka indlu eyayinkulu wayibona ingamfanelanga ngitsho wazizwa engelakho ukuthula ngaphakathi kwakhe.
Wangena ekamelweni lakhe wethula isudukhesi elikhulu waqala ukufaka impahla zakhe. Wayesezimisele ukuhamba. Wayengazimiselanga khona lokuthola uxolo kuMusa, wayengaziboni ephila ngaphansi kophahla lolu emva kwendaba kaSifundo.
Wafika uMusa ngelothando evule lengalo ukuze ange isithandwa sakhe ngokwejayekileyo. Wamangala ukubona uGugu ekhala kanti lempahla zakhe zipakitshiwe. uGugu wayegcwele izinyembezi etsho ukuthi yena uyahamba.
Wamcela ukuthi ahlale phansi ukuze amchazele.
