uMthunywa
Ophezulu Stinta
Ngokwazi kukaNgema kwakuzila ukuthi abakhwenyana balungiselelwe sengathi banxusiwe. Lapho-ke wayesexhophe owangakwakhe elihlweni ngoba wayengafuni ngitsho ukuzwa kusolwa abakhwenyana bakhe. Waze wazisa lomyeni wakhe lo ukuthi akhulule lelo ovalosi ayeligqokile ngoba ebona nje ukuthi lalizayangisa okwamagama phambi kwabantu ayebaphakamisile kangaka.
UNgema ukhanya eyindoda esalonda isiko lesiNtu. Kazange athande ukuqhuba indaba efana lale eyedwa kodwa wanxuswa umfowabo ukuze babonisane ngelihlo linye loba nje uMaNzuza konke lokhu wayekubona ngelinye ilihlo engafihli elokuthi kwakuzachitha umuzi womntanakhe. UMaNzuza wayekude lesiko, kuye okwakuqakethekile yikunotha kwabakhwenyana laba ayengafuni kubathontisa.
Besaphosana ngamazwi uNgema lo MaNzunza kwavele kwaqoqodwa ngasemnyango. UMaNzuza-ke yena wayevele eseqaphele okukodwa zwi, wayesilindele abakhwenyana. Lapho uNgema wathembisa ukuthi wayengabakhupha ngenduku aluba babengazithela ngokuqoqoda emnyango nje, okwakungabe kuveza ukungahloniphi.
Wavula umnyango hawu kwafikela kunguDudu umngane kaThobile omdala. Hayi uMaNzuza lomkakhe babadedela abantwana ukuthi basale bexoxa ezabo njengoba kwakulindelwe okukhulu.
Ababili laba bangena babingelelana ngelabacinana kudala. UDudu wayebabaza ukuthi inhlanhla engaka wayeyithole njani. Phela wayesezwile ukuthi inotho elapho yayisesabeka, kuthi lemfundo yakhona ingeyezinga eliphezulu.
UThobile laye wagcizelela ukuthi uBhekifa Bhengu lo wayemthanda okwamagama engafuni nje lokuzwa ngaye kodwa phezu kwakho konke wayelovalo ebona sengathi uthando lolu kumbe umuzi lo owawusakhiwa wawuzaphelela emoyeni.
Ekuxoxeni kwabo lapha kusalindiwe uDudu wabuza ukuthi kukhona nje ayengakubona lapha kuThobile, kucaca kwakuyisimanga nje. UThobile ngelingelakwethuka ngitsho lesazela wabuza kumngane wakhe ukuthi wayekhuluma ngesisu na. Wamazisa ukuthi leso wasikhupha ngoba sasingamphuthisela uBhekifa lo onethezela ngenotho.
