uMthunywa
Ophezulu Stinta
Kuleliviki sikhangela indatshana elesihloko esithi Iso ngeso. Kulindatshana sihlangana lomlingiswa obizwa kuthiwa nguZuma. Simthola lapha evakatshelwe ngumngane wakhe uMabaso.Ababili laba kukhanya sekulesikhathi bengabonani kulelo, uMabaso aphendule ngelithi ucatshe nje usebenza nzima okwamagama.Umabaso kusobala kwasekulesikhathi engasazi ukuvakatshela lapha ekhaya. Sinanzelela indlela uZuma abiza ngayo owangakwakhe umaNdaba ukuthi azobona isethekeli esiyisimanga.
Isethekeli lesi basemukela ngezandla ezifudumalayo, bemhlangabeza ngetiye ephelekezelwa ngezifela emlonyeni. Umuzi lo uvezwe njengomuzi olothando kanti njalo owamukela izethekeli ngezandla ezimhlophe lazo zizizwe zikhululekile.
Ngesikhathi uMaNdaba elungisa okuyangaphansi komlomo, ababili laba babezixoxela ngezebhola beyiphethe eyeqembu elalisidla ubhedu. UZuma kungathi nje kukhona ayekunanzelela okwakungamhambi kuhle kuMabaso lapho ethi yena “Mnyungwa sekuyiminyaka eminengi sazana futhi singabangani abakhulu. Ngitshele yini lena ekuphethe kabi?” (kukhasi 88).
Ukungena kukamaNdaba kwangathi kubaphazamisile ekukhipheni impendulo yombuzo ongaka. UZuma kazange awufihle umbuzo wakhe wachazela umkakhe ngelingakhekhelezayo ukuthi yena wayengaphatheki ngomngane wakhe lo, okwakukhanya sobala ukuthi wayekhathazekile.
Ngempela uMabaso wayekhathazekile, uyatsho laye ukuthi indaba ayeze ngayo lapha yayimsinda, kwakuzindaba ezibuhlungu okwamagama.
Indlu yonke yayisithithibele ilinde lezo ndaba ezibuhlungu. UMabaso wayethunywe ngu-Viljeon, ijaha elalisebenza eThekwini lendodana yalapha ekhaya okuthiwa nguNkululeko. UNkululeko kucaca wabhubha.
UViljeon wayesezimisele ukuyabhekana lekomiti yokubuyisana lapho okwakukhulunywa ngezokuxolelana.
Phambili kokuya lapho wayecela ukuthi acele uxolo emzini kaZuma. Yiyo indoda le eyayibulele uNkululeko kanye lenkosikazi yakhe.
Wayesevule isilonda esibuhlungu uMabaso, bakhala bebuza imibuzo eyayingeke nje iphendulwe ngubani.
Wayezocela uxolo lalaba bazali angakaze ame phambi kwekomithi yoxolo.
UNkululeko lo babembuka ngelesitha phambi kwamapholisa. Iqhaza ayelidlala kwezombangazwe babengalamukeli abanye.
