uMthunywa
IMBONGI ibona isimanga somkhuhlane osiqede uMaDube. Umkhuhlane lo usuqede uMaDube wabamncane kakhulu kanti yena ubelinina ebelinyathela kuzwakale phansi nxa lihamba. Kayiwuqedisisi imbongi lumkhuhlane yikho nje ibuza uMaDube ukuthi angabe ehlutshwa yini empilweni yakhe njalo udliwa yini ngoba kukhanya uyaphela kancane kancane. Kusobala kumbongi ukuthi uMaDube kulento emdlayo.
Iyaphambili imbongi ibuza ukuthi yisitha bani leso esingelasihawu njalo yinunu bani leyo engelasizi? Uphakathi kokuhlupheka okukhulu uMaDube okwenza imbongi ifise leso sitha loba leyonuna kube lesihelo kuye. Usumdlile umkhuhlane uMaDube okokuthi isimo sakhe sesiguqukile ngoba lembongi kayisambonisisi. “Nguwe kumbe ngomunye MaDube, pho usuyin’ um’ usunje na?” Imbongi ithi imazi ezimukile, esinda umhlaba uMaDube, kodwa lamuhla usezacile kakhulu yikho imbongi isithi “usiliphepha”.
Inkulu inguquko esikuMaDube ngenxa yokugula lokhu. Imbongi ithi imazi eyisimomotshwana okutsho ukuthi imazi emuhle kakhulu kodwa khathesi usemotshakele okutsho ukuthi ubuhle lobuya abusekho. Ubetshotshola uMaDube ehamba esiyale lale mhlawumbe edinga isilisa kodwa lamhlanje sekuphelile konke lokhu usetshona engoleleyo ngenxa yokugula. Ngenxa yobuhle bakhe uMaDube ubewahuga amadoda. “Ngikwaz’ ungubizabiza kodw’ awuselabiza,” ngenxa yokuba usegula ubuhle lobuya sebuphelile obebubiza amadoda sebuphelile, kabasela ndaba laye.
Ubebakhanga abesilisa engakaguli uMaDube kodwa khathesi sebemenyanya kasahawukeleki. Ubesenyanya umhlaba uMaDube kodwa khathesi yiwo osumenyanya. Ngumhlola lo obonwa yimbongi yikho ibabaza ibuza uMaDube ukuthi kungabe ikhuthuzwe yini intombi enhle kangaka. Usecakile lumama, imbongi ikufakaza lokhu ngokuthi amehlo akhe asewele egebhezini okutsho ukuthi asetshone phakathi. Amehlo la aseguqukile okwenza imbongi ibuze ukuthi khona ngamehlo bani la.
Lobuso bukaMaDube sebubude bukhonale ngenxa yokucaka. Idinga imswele lowo ongachasisa lokho kugula kukaMaDube. Ekhanda lapha inwele lazo sezibutshelezi njengoboya bukamangoye, lekhanda alaziyo sekuyisiphongo sodwa ngenxa yokucaka. Kuyisimanga kumbongi lokho yikho nje ihlaba umkhosi ithi kubikwa ngaphi indaba enje?
Iyambuza imbongi uMaDube ukuthi kungabe kutheni njalo ivuma ukuthi baqinisile abathi umhlaba uyaphenduka ngoba lamanje usephendukile uMaDube usengenye into engajwayelekanga.
Ayilamathe imbongi ize imbuze uMaDube ukuthi engabe udle yiphi impande angayiyelanga enyangeni? Izitho zomzimba kaMaDube azisaqedakali imbongi ize ithi umlenze sekuyisikhunyana lezandla lazo akusaqedakali ukuthi yizo. Iyambuza uMaDube imbongi ukuthi pho ukhangelwa njani nxa esenje, angene kugwalo olungcwele iBhayibhili abuze athi, “Thempel’ bani ke khonokho,” esitsho umzimba kaMaDube osudilika ubuthempele bawo sebuphela.
Iyaqhubeka kuviki ezayo.
