uMthunywa
SIHLANGANA njalo bafundi kuliviki silokhu siphethe inkondlo emayelana lenkululeko yesifazana njengokutsho kwesihloko sayo. Isifazana sesilenkululeko eyiyo ekhanya isisipha amandla phezu kwabomyeni baso. Imbongi isipha amalungelo isifazana esesilawo okungamelanga sibuzwe ngomkaso nxa siwathola.
Isilisa akusamelanga sitshaye isifazana ngoba ngokwenzenjalo singafela ejele. Sekumele lawo amadoda aphekele isifazana ngoba kunsuku ezedlulileyo abephekelwa wona ezihlalele. Laso khathesi isilisa kasiphekele isifazana sona sizihlalele sithe pekle. Indoda akusamelanga ibuze umama lo ukuthi uvela ngaphi ngoba uselamalungelo.
Kayizigcine izingane zayo lindoda ngoba vele ngabayo labo bantwana. Indoda itshelwa ukuthi kayitshukatshuke izitshubo zabantwabayo, ibuzwa njalo ukuthi ikhalelani yona ilezandla.
Indoda ikhuthazwa ukuba imvulele masinyane lo owesifazana ngoba uzazonda, uvela kulokhu abathi yi-baby shower. Njalo kamvulele masinyane ngoba uzazonda kakhulu uvela ku-kitchen top-up. Indoda ikhuthaza ukuthi ingambuzi lutho ngoba angazonda kakhulu okwenyamazana le okuthiwa yiNyathi elolaka kakhulu. Kuthiwa kayivule umnyango ngokuphangisa ngoba uvela ku-money link engazonda kakhulu. I-money link le yimdlalo yokutshayelana izimali omama behlangane belixukwana.
Isifazana sesilamandla ngoba imbongi ithi indoda kayiphangise isivulele njengoba itsheliwe nje lamuhla ingatshelwa amagama amabi okutsho ukuthi ingathukwa. Indoda ikhuthazwa ukuthi ithathe ukudla kwayo emkulwini ngoba sekwedlula ukuthi isifazana siyinike ukudla ngoba sesilenkululeko yaso sesiphumile kukugqilizwa yisiliswa. Indoda kuthiwa kayizithathele ukudla kwayo ngoba isifazana sesilele. Indoda ikhuthazwa ukuthi idle ithule ingabangeli umama lo umsindo.
Ingabanga umsindo indoda le isifazana sizazonda ngoba kasithandi ukuphazanyiswa ebuthongweni nxa silele.
Kunzima kulindoda ngoba isitshelwa ukuthi kasiphe iholo lakhe lesisifazana. Kumele indoda ichasise ukuthi eyinye imali uyenzeni. Kayimelanga ibuze iholo lomkayo lindoda ngoba isebenzela yena. Kayimelanga itsho lutho ngeholo lesifazana sayo ngoba imbongi ithi ingalala ingalele okutsho ukuthi umama lo engayikhulumela kubi ubusuku bonke yehluleke ukulala.
Ngenxa yamalungelo aselawo lumama uselakho ukwala ukuba labanye abantwana ethi bonabo abalabo benele.
Amalungelo aselawo lo owesifazana asehambe kakhulu ngoba kukhanya ulomunye umntwana omzalele lapha kodwa ongasuye wendoda le alayo. Imbongi iqinisa lindoda ukuthi ibe lesibindi ngoba kulesaga esithi ezalelwe esibayeni sakho ngeyakho. Ungeze wala umntwana ozalelwe egumeni lakho uthi kasiwakho.
Aqatha amazwi imbongi ephetha ngawo nxa ibuza indoda ukuthi ifuna ezani ingane yona ingela kuzithwala?
Umama kumele azithwale. Amalungelo esifazana asesitsho inguquko yokuthi lamadoda azithwale? Hatshi, bo!
