uMthunywa
AKE SIPHUTSHISE inkondlo, Ilanga lisitshonele, esiyiqale kuviki ephelileyo yona elotshwe yimbongi uMihla Sihla.
Sikubonile ukuba imbongi iyalila kumbe iyakhala ngokudabuka okukhulu ngokutshiywa liqhawe lenkululeko yeZimbabwe umuyi uJoshua Mqabuko Nkomo. Ukukhothama kweqhawe leli kutshiye abantu besegcekeni bengelamthunzi. Ukukhanya konke sekubaphelele nanku imbongi ithi, “Iyez’elimnyama lisembese, ilanga lisitshonele kusemini.”
Sikuchazile lokhu ngeviki ephelileyo ukuthi kungabe kusitsho ukuthi uJoshua Mqabuko Nkomo obengumthunzi wabantu ebavikela kuzinhlupho ezinengi okutsho ukuthi ukutshona kwakhe sekubatshiye phakathi kwesithuli betshotshobele bengazi ukuthi benzeni. Kabasakwazi ukuthi benzene abantu ngoba lowo abebethembele kuye esedlule. Imbongo ingathekisa leliqhawe elinguJoshua Mqabuko Nkomo ithi ngumthunzi osuphetshulwe ngumoya.
UJoshua Mqabuko Nkomo ubengamele abantu waba njengomthunzi wabo obavikela ekutshisweni lilanga kodwa ukufa kwakhe sekubatshiye egcekeni okunjengokuthi umthunzi wabo usuphetshulwe ngumoya, abasela mvikeli kubunzima abangabe behlangana labo. Umthunzi wabo njengoba ungasekho nje kutsho ukuthi sebesele egcekeni bebhadlwa lilanga. Nxa abantu bengacatshanga emthunzini ilanga litshisa ilanga liyabatshisa okwamagama yikho nje labantu laba sekuthiwa babhadlwa lilanga ngoba umthunzi wabo uJoshua Mqabuko Nkomo engasekho.
Kunzima lapha njalo lembongi iyakubona lokhu yikho ibuza ukuthi nxa sebephakathi bokubhadlwa lilanga kanje pho ngubani ozabathoba? Kalisekho iqhawe elikhulu ebelingabathoba. Akula okuthandabuzayo ukuthi kufe umuntu omkhulu, yikho nje imbongi ithi wonke umuntu uzavumelana layo ukuthi lamhla inkosi ikhotheme.
Inkosi kumbe umuntu omkhulu akuze kwathiwa ufile kodwa kusetshenziswa amazwi okugcwigcwiza anjengokuthi ukhotheme, utshonile kumbe ubhubhile.
Likhulu leliqhawe eselidlule ngoba lifaniswa lesikhukhukazi sona esifukamela amatshiyane siwavikele engathathwa lukhozi kumbe ohelwane kodwa sona singahwithwa sithathwe yilezo nyoni amatshiyane asala egcekeni kungasela ozawafukamela. Kunjalo-ke lapha nanku ukufa sekuhwithe iqhawe elinguJoshua Mqabuko Nkomo ebelithenjiwe bonke labo abebethembele kilo sebesele egcekeni bengasela ozabavikela kunhlupho abalazo.
Imbongi iyalidumisa njalo iyalikhonza iqhawe elinguNkomo ngoba ulibiza ethi ngubaba wesizwe njalo wesaba lokuqamba ibizo lalo ngoba ubemkhulu, njalo umsebenzi wakhe mkhulu. Mkhulu uNkomo njalo mkhulu lakuyisemkhulu kanye lakumakhosi amakhulu. Ingezake iphethe inkondlo yayo ingaliqambanga ibizo laleliqhawe ngoba abasakhulayo bengasala bengalazi. Ngalokho-ke uthi sekumele aliqambe ibizo leqhawe leli ukuze abasakhulayo balazi njalo bazi lokuzimisela kwalo leli qhawe lifisa ukuthi iZimbabwe ikhululeke.
Iyaliqamba ibizo laleli qhawe imbongi njalo isitshela ukuba iyamesaba umuntu omdala. “Joshua Mqabuko Nyongolo Nkomo ngiyakwesaba munt’omdala. Imbongi iyambonga uNkomo njalo ithi ibisafisa ukuba laye izwe imfundiso yakhe.
