uMthunywa
Charles Dube
IMBONGI isitshengisa imizwa yomuntu ophakathi kothando. Umuntu lo kungaba yiyo imbongi kumbe omunye umuntu. Mikhulu imizwa yothando kumbongi ngoba ithi lanxa ilanga litshisa imini yonke izibona isingehugeke yabaseduze kwesithandwa sayo. Nxa isiseduze kwesithandwa sayo iskhudumezi somzimba waso siyayilolozela imbongi. Isikhudumezi leso siyayiqumbaqumba emibilini, ngaphakathi kwayo imbongi, sibilise uthando olukade luholoba ngaphakathi.
Isithandwa sembongi lesi siyaziqhola ngamakha anukelela kakhulu ngoba kwenela ukuphephetha umoya kamnanjana nje ihle iwezwe imbongi aqale ukuyiqhweba ngoqhatshi amakha lawo. Hatshi okweguqa liqeda uchago kunkomokazi kodwa amqhweba okwesidandane, (intombazana) sibiza insizwa ekhonjwa kakhulu, inkonjwa. Amakha lawo anukelelayo aqhweba lomuntu ozedlulelayo aze anqekuze ikhanda esizwa lokho okunukelela kamnanjana.
Amakha lawo ayiqhweba isondele layo imbongi kusithandwa sayo.
Amakha lawo ayiqungile ingqondo yembongi yathunjwa yiwo njalo. Amakha lawo aseyidonsele kusithandwa sayo. Umnuko mnandi wamakha la imbongi ithi asuke lomoya wayo aya endaweni ekude, ekudeni. Ekudeni lapho amfikisa khona kundizwa ethandweni njalo inamathelene lesithandwa sayo okwesinama ebusika. Lapho bayabe sebehlezi kuhle sebenabe okwentanga ehlanzayo yona etholakala inabe yagcwala indawo yonke.
Ngalokhu kutshengisa ukuthi bayabe bechelesile, bephakathi kwenjabulo kungekho okubakhubileyo. Indawo le esekudeni inhle okwamagama lapho bentsheza okwenyeluka emanzini. Inyeluka yinhlanzi othi uyikhangele uphose uthi yinyoka abathi ibanjwa ngabalenhlanhla. Intokozo le abaphakathi kwayo ekudeni yenza baphakame okomkhumbi phezu kweminyakazo yamagagasi olwandle. Bgideli umculo okugubhu lwabeLungu kodwa lanxa bephakathi komsindo lowo bayezwana ngoba inhliziyo zabo zigida msindo munye njalo bathandelwe mthando munye wothando.
Iyamangala imbongi ize ibuze ukuthi makha bani alamandla angaka? Yikuqhola okunjani kumbe kuphi okumkhanga kumhuga kangaka khona kungesibhungayezi lothando oluphakathi kwabo? Lona uthando elalo imbongi luyantantalaza (luyagijima) ebuntintinini bayo adingwe ngamadlozi, amathonga othando olujulileyo. Iyakhala imbongi ngoba ayiseyiyo, yena qobo lwakhe sowathathwa luthando lwesithandwa sakhe.
Iyaphambili ikhala imbongi ithi kayiseyiyo. Ubunguye bayo sebathathwa yimizwa yothando lwesithandwa sayo. “o! maye min’engingeseyimi! Umin’uqobo sewaminzwa yimizwa yothando lwakho.” Isiveza imbongi ibizo lesithandwa sayo ukuba nguSibongile yena ongabongekiyo ngoba esakhe isibongo singaphathwa ebandla. Obhadlazayo uSibongile lo uyamhleka usulu ngoba engekho kuye kodwa olaye umbonga ngoba engelaye.
