uMthunywa
Lo okhuluma lapha okungaba yimbongi yona elobe inkondlo le uyakhala ngobubi obulethwe ngamadlozi amabi ebantwini. Nxa ekubeka kanje kutshengisa ukuba akhona amanye amadlozi amahle angahlala ebantwini kungabi ndabazalutho. Kodwa la amabi imbongi ithi kawaphume ebantwini.
Imemeza imile ngaphansi kwezihlahla ezinde eziyimihlobohlobo; umi ngaphansi kwemiganu, imvagazi, lemikhaya lakuzo zonke ezinye angazaziyo. Zilamahlamvu aluhlaza tshoko izihlahla lezi zinika imithunzi, kanye lokuphephetha komoya oqandayo. Kayithulanga lapha emi khona imbongi kodwa iyamemeza, imemeza umhlolo kuMahlabezulu.
Ngelizwi elikhulu ibiza imimoya emibi ebantwini. Ukubiza kunganeno ngoba imbongi ithi ikwaza kakhulu ngemimoya emibi ehlupha abantu emhlabeni.
Iyaqamba imbongi uhlupho olulethwa yimimoya emibi ebantwini. Imoya emibi le iletha ubusela, ubugebengu lobugangi. Uyaphambili ethi ukhulekela labo abalamadimoni ngoba konke lokho kuyimimoya emibi njalo ngamadlozi amabi ebantwini. Abantu abenza lobo bubi kutsho ukuthi balamadimoni lamadlozi amabi. Lanxa kunjalo imbongi ithi abantu kabasondele kuyo yelule izingalo zayo, izibeke ezayo izandla phezu kwamakhanda abantu, ikhothamise elayo ikhanda itshengisa yona inhlonipho, ukuthobeka kwayo kanye lobuntu bayo.
Iyaphambili imbongi imemeza ithi kawaphume ebantwini amadlozi amabi. Kawaphume amadlozi amabi ebantwini awele elwandle lapho okungafinyeleli muntu khona. Iyabakhalela imbongi labo abalamadimoni azibonakalisa ngokuzitshaya kwabo labo abalawo. Abanye babhodla njengezindlovu eziginye esingakwaziyo thina abantu, abanye labo babhonga okwezilwane. Abanye kuthiwa balenyongo ebabayo emlonyeni okuyikuthi bakhuluma inkulumo ezimbi okungaba ngezithuka abantu.
Abanye ngenxa yenzondo behluleka lokukhuluma, imbongi ize ithi balamafindo emphinjeni. Abanye labo bayesabeka ngoba kuthiwa balamehl’ahlaba kubi kuze kuthi lanxa behlezi kuthi kabaginye amathe olaka. Abanje yilaba abahlala befuna ukubona izidumbu okutsho ukuthi ngababulali, bonke besenziwa yiwo amadlozi amabi. Ngenxa yobubi lobu obukhona emhlabeni imbongi isimemeza ukuthi akuvuke amadlozi amahle wona athethelela ogulayo asile.
La madlozi amahle athethelela oqhulayo asile kulesosifo. Imbongi ithi kawavuke amadlozi amahle alinde abantwana, abantu phela. Iyaphambili imbongi ithi amadlozi la amahle kawaxotshe yonke imimoya emibi.
Olohlanga, okutsho ukuthi olomoya omubi oloyayo kuthiwa makageziswe ngezulu elikhulu lenkobe, elesiqhotho luphele lolohlanga lokuloya elele obukhulu ubuthongo.
