uMthunywa
Ophezulu Stinta
SISAQHUBEKA lendatshana elesihloko esithi Ichumi Leminyaka. Kulesisihloko sikhangelele ukuthi kunengi okwenzakala ngesikhathi eside kangaka. Kungenye yenjongo zomlobi ngezindatshana lezi kusabela ngezehlakalo ezazikhona ngesikhathi kulwelwa inkululeko elizweni lase Mzansi Africa. Yindlela yakhe yokubonisa ubuhlungu obabudalwa yilesi sikhathi. Abanengi balahlekelwa ngamakhaya abanye basala bezintandane usizi lodwa nje oludabula inhliziyo abanye belahlekelwa zimpilo zabo.
Kuyindlela yomlobi yokusondeza uzulu wase mzansi Africa ukuthi azwelane lalabo abanikela ngempilo zabo beyolwela inkululeko yelizwe. Indatshana le ingumfanekiso obukiswa ikakhulu ontanga laba abazelwe ilizwe selikhululekile ukuthi bakwazi imvelaphi yabo. Labo bazimisele njengalabo abafana lo Ndumiso abanikela ngempilo zabo bafulathela lapho okwalahlwa khona inkaba zabo.
Safika ke isikhathi sokuthi baphindele ekhaya oNdumiso wayejuluka ngokuthaba. Ayikho into eyayimjabulisa ngaphandle kokuthi lelolanga wayezabona uHlengiwe loba nje wayesazi ukuthi sokulomgwaqo phakathi kwabo.
Ekufikeni kwakhe egcekeni lendizamtshina wazisiza ngogwalo lwenombolo zocingo. Kulapho ayedinga khona uHlengiwe kuzo zonke izibongo zakoMthembu, kodwa lutho kwaze kwathi ekucineni watshayela emsakazweni ecela ukuba umuntu ogama lakhe linguHlengiwe Mthembu owayehlala kukheli aliqambayo aze atshaye ucingo kunombolo thize.
Walinda eqaphe ngazo zombili uNdumiso kwaze kwathi laye engasazi nje ucingo lwakhala. Walizwa ilizwi lika Hlengiwe. Wamazisa ukuthi laye wayeze leqembu elalize ekhaya ngendizamtshina wayephakathi kwalelo qula elalihlabela lijabula lapha esilindweni sendizamtshina. Bobabili babengakholwa ukuthi ngempela babekhuluma bonke ngemva kweside kangaka isikhathi. Bamisa ukuthi babonane khona esilindweni sendizamtshina lapha.
Kuyini okwakungabamisa. uNdumiso wayelokhu elawo umcabango kaMthandeni lapha engqondweni yakhe.
Wayengazi ukuthi wayezathini ke ngalowo mgoqo.
Waze wafika emagcekeni endizamtshina akubo. Amehlo ayedinga uHlengiwe. Walinda walinda engasazi wambona uHlengiwe eqhubana lensizwa efan lo Mthandeni, inhliziyo yakhe yahle yabamnyama. uHlengiwe yena kwakungela lutho nje oluthini. Wayejabulile ejabulele ukubona uNdumiso wamanga, bangana kwabamnandi.
Uhlengiwe laye waze wathi ngelikade wakhona ecabanga umuntu ayehamba laye owayevele laye esenyamalele kulelixhuku. Yakhululeka inhliziyo yakhe esesizwa ukuthi kwakungasuye uMthandeni kwakungumzukulu wakhe lowo abafana xathu. uMthandeni wabulawa ngemva kokutholwa ukuthi wayengumthengisi. UHlengiwe wayesengoka Ndumiso, isicelo sakhe seminyaka ngempela kunengi okwenzeka ngetshumi
