uMthunywa
Ophezulu Stinta
UNgonyama kwasekumele avule incwadi le ayengayazi ukuthi iquketheni, wazama ukuxoxaxoxa loKhotso uNgonyama embuza ukuthi ngalelolanga wayengayanga na esikolo. Kwaphendula ngelimsulwa kusithi uyise wayethe amlindele khonapho angaze asuka. Kwacaca-ke ukuthi wayevele emtshiye lapho ngenhloso yokuthi umnikazi wehofisi wayezamthola lapho abone icebo ngaye.
Wayivula incwadi uNgonyama, yayivela kumngane wakhe onguBubbles.
Encwadini lapha wayexolisa ngokwehluleka kwakhe empilweni. Phezu kwakho konke uNgonyama ayemelele khona, isibongo yikuzomlahlela umntwana enjalo engela lampahla.
Esikunanzelelayo lapha encwadini okuthintayo ngendlela ebuhlungu yikuthi uNgonyama uzakhetha afuna ukukwenza ngoKhotso. Ngelingalanhlonipho uBubbles uthi angamkhulisa abe ngumfazi wakhe wesibili kumbe njalo abe yisichaka sikaMaMsie unkosikazi kaNgonyama. Konke lokhu kuphambene lobuntu kanye lamalungelo abantwana. UBubbles ucacile nje ukuthi umcabango wakhe ufiphele ngendlela ebuhlungu, wehluleka khona ukunanzelela izidingo zengane yakhe ukuze layo ikhule ilekusasa elikhanyayo.
Eqeda ukuyibhala incwadi leyo uNgonyama wanikina ikhanda wazincweba wahleka engahleki. Wayezibuza ukuthi yimihlolo bani leyo eyayimvelela, kwakunzima ukukuzwisisa lokukukholwa.
Wabamba uKhotso ngesandla waphuma ehofisini lapha wakhiya. Bangena emoteni waluqondisa endlini kaBubbles.
Lapho ethutsha nje wabona injetshane eyayigijigijima phandle ukuthi okunengi kwasekutshintshile.
Wehla waqonda phakathi endlini lapho atshelwa khona ukuthi uBubbles wayeyithengisile indlu. Akula muntu owayesazi lapho ayeqonde khona.
Kuyamangalisa njengoba laye uNgonyama emangala ukuthi ukwenza kukaBubbles ngokomuntu opheleleyo na ngokomcabango. Ngelokuthengisa indlu kusobala ukuthi wathola imali ethile wehluleka ukubhadala izikwelede ayezithethe kuNgonyama. Kwabanzima khona nje lokuthi athengele uKhotso impahla. Pho leyomali wayisa ngaphi, nangu nje lomntwana oyedwa alaye emhlabeni uyehluleka ukuthi amgcine. Indoda eyayisihlala lapha ekhaya yalandula ngelempahla zikaBubbles ukuthi wayeselempahla. Zonke wazithengisa wathengisa kanye lezomntwana.
Kanti yayingeyani imali engaka ayeyithengisela yena esehluleka khona nje lokubhadala izikwelede.
Into eyayisikhathaza uNgonyama ngezinga eliphezulu yikuthi indaba kaKhotso wayezayibika njani kuMaMsie inkosikazi yakhe. Wayemazi emqonda ukuthi wayelenhliziyo elidwala, ubuntu babungekho kuye. Wayengazi futhi inhloni, izihlobo lezethekeli zazingalugxobi lapha emzini wakhe. Wayebatshela engagcwigcwizi ukuthi babemotsha ukudla kwakhe lapha ekhaya. Pho uKhotso wayezamemukela na, omunye njalo umlomo osufuna ukudla lapha ekhaya? Ngempela wayesephakathi komlilo ayengazi lokuthi ngubani owayengamephula kuwo.
