uMthunywa
Ophezulu Stinta
Silayo indaba kaMaMsie yokungafuni umtakaBubbles endlini yakhe. Lapho ehlezi yedwa zake zabuya kuMaMsie eziqotho wakubona nje laye ukuthi uNgonyama wayephakathi kohlupho, akukho ayengakwenza ngaphandle kokugcina umntwana kuphela. Into nje ayeyifuna yikuzwisa umkakhe ubuhlungu njengoba wayengasatholanga ithuba lokuyazikholisela endaweni zakhe njengomuntu owenza akuthandayo.
Ubuwula bukaMaMsie buzwisa ubuhlungu. Uphatha kubi umkakhe omthandayo aziphosele kuJoza odlala ngenhliziyo yakhe, othi lapho engekho azikholisele labanye abesintwana. Yena uJoza wayeziphakamisa ngokubona abesintwana beminyezelana ukumthokozisa. UMaMsie laye wayekuleloqembu eliminyezelana ngoJoza. Wamtshayela ucingo ekhalaza ngobunandi bonke ayebukhuthile. Bathembisana-ke ukuya komunye njalo umdlalo njengoba bengabantu bokukholisa. UJoza uvumelana loMaMsie nje ngapha uthembisane lomunye unesi ukuya ebhayisikopo. Pho wayesezabaphatha njani-ke?
UKhethiwe umngane kaMaMsie wazama ukumbonisa umngane ukuthi uhambo lwakhe loJoza lwaluzamthezela olulenkume. Wala lalapho ezama ukumchazela ukuthi uJoza lo ugcwele izigigaba, ayekubona nxa ethe wazonatha ngakwakhe kwakumsinda. Wayengathi uthela amanzi emhlane wedada, aze agcizelele kuKhethiwe uMaMsie ngokuzisola ukuziphosela kwakhe kuNgonyama. UMaMsie wayengafuni muntu omxwayisayo ngitsho nangu wayesedonse umlomo usumude lapho uKhethiwe ezama ukumbonisa ngempilo.
Walunga kusemasinyane uMaMsie ngemva kokukhuluma kwakhe loKhethiwe. Wafika koNdumela lapho okwakunathwa khona inengi lingakafiki, kambe abantu besemsebenzini. Wafika lapho wazigoqa wazikhetha ekhoneni lakhe. Wayengafuni muntu owayefika kuye ngelokumphambanisa, labo bananzelela ukuthi ngumuntu owayelande othile.
Latshaya ihola lokuqala, latshaya elesibili, ledlula elesithathu lelesine elindile. Lapha-ke isikhathi sasesitotoba uJoza ungabona. Inhliziyo isiyophe yaze yopha amanzi. UJoza wayesebunandini le ebhayisikopo lonesi wakhe bethintana ngamnandi konke kuhamba kuhle kibo lapha. UMaMsie wayevele engekho ngitsho engqondweni kaJoza lapha. Kwaze kwatshaya ihola lesihlanu elindile.
Wabona nje kufanele abuyele egumbini lakhe engabuzanga, engatshelwanga muntu. Wahamba ezibuza ukuthi yinindaba konke kugeleza inkulumo kaKhethiwe ngoJoza wakhe lo. Lowomcabango uminywe ngokumnqinekela uJoza ukuthi engxenye kukhona okubi okumehleleyo. Pho njengoba wayengelacingo endlini yakhe wayemthola ngaphi-ke ukuze asuthiseke ngokuthi kakulalutho olubi olumehleleyo.
Wangena vele esevuse umhlonga endlini lelolanga. UNgonyama nguye owabuza amatshono. Wawawutshuza amanga uMaMsie ngelithi wayetshone elinde umuzi kungelamuntu. Wamzwela uNgonyama waze wamtshela lokuthi wayefise lokudlula emkhangela wabuya njalo wazisola ngelithi babezakuthi sehlala emlandela, kulelo uMaMsie wabonga wagomela ngoba wayezamthola ngaphi.
