uMthunywa
Kusobala ukuthi loba indlela zokuhambisa imibiko ebantwini sezitshintshile sekule-facebook, whatsApp, twitter lezinye kodwa bakhona abalobi abalokhe besaloba izingwalo phansi ukuze uzulu azibalele yedwa. Kuliviki uMthunywa udibane lomlobi odumileyo uDumisani Felu Gumpo oloba imidlalo, izinkondlo kanye lezingwalo.
Zizwele okunengi ngalumlobi kungxoxo elandelayo phakathi kukaEthel Ncube (EN) loDumisani Gumpo (DG).
EN: Uzulu uthanda ukwazi ngawe bachazele ngembali yakho?
DG: Mina nginguDumisani Felu Gumpo ngazalelwa eLupane, esigabeni seLupanda ngomnyaka ka1966. Ngafunda eMkhombo Primary lePhumakanye Primary school. Imfundo yaphezulu ngayenzela eMagwegwe Secondary School ngacina kugwalo lwesine kumfundo yaphezulu. Ngo1985 ngayenza iAdvanced Level leOpen University eEngland ngikhonapha kwelakithi. Ngilesicoco kuSocial Housing njalo ngafundela ukuba nguEnvironment Health Technician kwezwempilakahle. Ngake ngasebenza leEcomark limited eHarare nginguCustomer Relations Officer.
EN: Waqalisa nini ukuba ngumlobi?
DG: Ngaqalisa ngo1983 ngisesikolo ngikugwalo lwesibili kumfundo yaphezulu lapho esabumba iqembu okuthiwa yiSchool Actors and Writers silaboAlbert Nyathi. Ngemva kwalokhu ngancediswa nguPhathisa Nyathi, lomuyi uMthandazo Ngwenya ukuthi nxa ngiloba imibhalo yami kudingakalani njalo ngilobe njani.
EN: Sowake wathola na umvuzo wokuba ngumlobi?
DG: Ngake ngathola isicoco sokuba yi-Lifetime writer in Arts eNgilandi.
EN: Ukwenelisa njani ukuloba njengoba ulemuli efuna ukuchitha isikhathi lawe?
DG: Ukubhala lugqozi, ugqozi lwakhona lungafika ukuthi ngibhale ngiyasuka ngiyehlala ngedwa ngibhale nxa lufike ngilabantwana ngiyabaxolisa basuke kimi ngiqalise ukubhala ngoba ukuloba ngikuphatha njengomsebenzi.
EN: Ukhangelele ukwenzani kuwonalo umnyaka?
DG: Ngikhangelele ukuthi ugwalo lwami oluthi “Nyakana kampeyana” ludindwe ngoMpandula khonapha koBulawayo. Kulandele ukudindwa kolunye oluthi ‘Ngangilandani eLondon’.
EN: Ngaphandle kokuloba kuyini okunye okwenzayo?
DG: Ngiyasebenza eNgilandi ngingu-Housing Officer.
EN: Njengoba ungumlobi ulobela ukuthengisa kumbe ukukholisisa umphakathi?
DG: Angilobeli ukuthengisa ngingaze ngilobe angikhangeleli inzuzo yemali ekulobeni kwami. Ngilobela ukuthi uzulu afunde njengoba ngangilobela ugatsha lwezempilakahle imidlalo eyayiphuma kuRadio 2 (Radio Zimbabwe) njalo lokuthi uzulu athole umbiko mayelana lempilo.
EN: Mazwi bani enkuthazo ongawapha abalobi abatsha?
DG: Okokuqala ngikhuthaza abalobi ukuthi babelesibindi. Abatsha kababale izingwalo ezalotshwa kudala ukuze ulimi lwabo lungafi njalo kababhale ngolimi oluhambelana lesikhathi njengemidlalo kumele kulotshwe ngolimi olwaziwa ngabatsha. Ikanti izinkondlo ukuze zizwakale uluju lwakhona njalo zinambitheke abalobe ngesintu esijulileyo ukuze inkondlo zihlabuse njalo abalobi kumele bazimisele ngoba ukuloba akulula kunzima kodwa kumele uzimisele.
UDumisani Felu Khumalo uthethe ulabantwana abane njalo ezinye inkondlo azilobayo zikuqoqo lezinkondlo Ezivusa usinga.
