uMthunywa
YiNtatheli kaMthunywa
BATSHELWE ngamanzi abaphurofethi bamanga belinye ibandla lesiPostoli elidumileyo kulandela ukubanjwa ukuthi bahamba bephorofitha amanga qede babhadalwe inkalakatha zemali okubangele ukuthi abanye abadlelwa imali engaba yi 60 000 Pula bababuzisise ngalokhu bethatha ividiyo kwenye indawo eseSouth Africa.
Kuvidiyo ekunkundla zokuxhumana uCosmas Ncube odabuka eNtabazinduna uchaza ukuthi useqile abantu ngesiphurofethi samanga endaweni ezibalisela iZimbabwe, Botswana kanye leSouth Africa.
Kuvela njalo kuvidiyo ekunkundla zokuxhumana ukuthi ukuze abanjwe uCosmas abanye abaqilwa imali bamtshayela ucingo bamqambela amanga ukuthi batshontshelwe imota kungakho badinga usizo lwakhe.
UCosmas ubalayela emzini wakhe bathi befika abatshele ukuthi imota etshontshiweyo isithengiselwe umlungu kanti badlala ngaye bafuna nje ukubona ukuthi uyaboniswa na. Kuvidiyo leyo uCosmas ulaya labo abatshontshelwe imota ukuthi babuye bephethe i-7 000 rand ukuze abasize ukuthi bathole imota le etshontshiweyo.
Khonokho nje baqala ukumvezela izikhali bamtshele ukuthi akulamota etshontshiweyo bebefuna ukubona ukuthi uyaboniswa ngempela andubana baqale ukuthi kachaze ukuthi vele yena wenza njani nxa eqila abantu imali zabo.
Uqhubekela phambili echaza ukuthi ulilunga lebandla leTwelve Apostle njalo usebenza ngaphansi kukamfundisi uChris uqhubeka echaza ukuthi waqila labo bantu imali engange 25 000 rand njalo limali wathenga inkomo lemota ngayo futhi kasela ndibilitshi.
“Sahamba eBotswana safika saphurofitha sasesiphiwa imali ukuthi siyetshaya ithuna sithe sisuka lapho saya koBulawayo sasuka lapho sangabuyeli eBotswana saya eGoli abantu laba bangilandela lapho abafike bambamba khona imali yabo engayithathayo yi 60 000 Pula njalo imali yabo bayayifuna.
“Ngiqile laba abantu imali yabo eBotswana baze bazongithola lapha eGoli,” kutsho uCosmas.
Kuvidiyo yesibili ubonakala esencenga ukuthi bangambulali loba engalamali. Sokusiya emaphathelweni evidiyo uCosmas uzama ukukhumisana umlotha lamadoda la ethi ucela ukubiza udadewabo lomkakhe ukuthi bazomsiza ukubhadala amadoda la asemthwalele inkafulakufa.
