uMthunywa
Ethel Ncube
MTHWAKAZI omuhle kuliviki iphephandaba likazulu lidibane lentombi edume kakhulu kwezomculo ehlabela ngamaphimbo amnandi ebithekelele kwelakithi ngempelaviki ivela e-Eastern Cape eMzansi Afrika. Umhlabeleli lo odume ngokuthi nguVictoria Suthukazi Arosi uxoxe loMthunywa kuliviki, ukutshelwa yikuncitshwa. Qhubeka ufunda ingxoxo eyenziwe nguEthel Ncube (EN) lomhlabeleli uVictoria Suthukazi Arosi (VSA).
EN: Akutsho ntombendala ukuthi udabuka ngaphi njalo ungowangaphi ujongeni kwezomculo?
VSA: Mina ngazalwa ngo1961 mhlaka 10 Mbimbitho e-Eastern Cape eMzansi Afrika. Ezikolweni ngafunda endaweni ezitshiyeneyo ezibalisa Eastern Cape, KwaZulu-Natal. Kwathi ke sengiqedile iMatric ngahamba ePretoria Technical ngisiyafunda ngezomculo lapho engathola khona iDiploma leMusic ngiqeda izifundo zami ngaqala ukucula.
Ngilomntwana oyedwa ongumfana, kangendanga.
EN: Waqala nini ukuhlabela?
VSA: Ngaqala kudala ngisafunda kugwalo lwami lwemfundo yaphansi, ngangiphatheka ekuculeni esikolo ngakhula nje ngingumuntu ohlabelayo. Ukuhlabela okuzwayo sengikhipha amadlalade ngaqala ngo1997 sengileminyaka edlula engu-25 ngihlabela.
EN: Yiwuphi umhlobo wezingoma owuculayo?
VSA: Ngihlabela imihlobo etshiyeneyo kakhulu ebalisa iAfrican rooted, Afrojazz lezokholo. Ngilengoma engazipheka ndawonye labahlabeleli abalodumo abafana loRebbeca Malope loDeborah Fraser.
EN: Ingoma zakho zilemfundiso bani kuzulu?
VSA: Ziyafundisa ngobuntu ukuthi umuntu kumele aziphathe njalo angehlukani lobuntu bakhe. Ezinye ngezelapha imiphefumulo elahlekileyo edinga induduzo ledinga ukwazi uNkulunkulu.
EN: Yibaphi abanye abahlabeleleli beZimbabwe osowake wahlabela labo?
VSA: Sengike ngasebenza lomhlabeleli odumileyo khonapha ekhaya uOliver Mtukudzi ngahamba laye amazwe atshiyeneyo.
EN: Yiwaphi amazwe owahambayo ucula izingoma zakho?
VSA: Ngahamba amazwe amanengi kakhulu abalisa iMalawi, Germany leUnited States of America.
EN: Abantu bathini ngomsebenzi wakho wokuhlabela?
VSA: Bayajabula bayawuthanda ngoba abanye baze bambize bezongibonga bengipha imivuzo endaweni ezifana laboSoweto. Lalapho engangihamba khona ngangitshiya abantu bencoma befisa ukuthi ngabe ngiyahlala ngibahlabelela.
EN: Sowake wathola imivuzo na ngokuhlabelela?
VSA: Sengathola imivuzo eminengi kakhulu. Ngathola kuSouth Africa Music Association (Sama). Ngaphinda ngathola isicoco kuhulumende weMzansi Afrika ngokuba yimi umama wokuqala ukuhlabela ngezamasiko emhlabeni wonke jikelele.
EN: Ingoma zakho wazincindezela yini?
VSA: Ngilamadlalade amanengi engawakhiphayo alezingoma zami ezitshiyeneyo ngihlabela labahlabeleli abatshiyeneyo abathi uZahara labanye abeMzansi Afrika.
EN: Ukhangelele ukwenzani kuwonalo umnyaka ka2015 ungakapheli njengoba nje sekusele iviki eyodwa ukuthi siwuqhibe?
VSA: Ngikhangelele ukukhipha idlalade lami ngiloHugh Masikela engisaqedisa ukulipheka estudiyo sami.
EN: Nhlupho bani obhekane lazo njengomhlabeleli?
VSA: Inhlupho zinengi njalo azipheli kodwa engingakutsho loba yiluphi uhlangana lalo bikela uNkulunkulu nguye ozakuncedisa ekunqobeni. Inkinga ekhathazayo yimali kodwa ngiyasebenza ngakhonokho engilakho kuzalunga ngokuya kwesikhathi.
EN: Uyasebenza na njalo usebenza ngaphi?
VSA: Ngiyasebenza ngingumdlali kuMzansi Magic ngidlala ezindaweni ezitshiyeneyo.
EN: Wenelisa njani ukuhlabela njengoba ulomunye umsebenzi owenzayo?
VSA: Isikhathi angisisweli nxa ngitshayisa kanye lamalanga lapho engingayi khona emsebenzini ngitshona ngise-studiyo sami ngilolonga izingoma zami lokulungisa amadlalade ami.
EN: Nkuthazo bani ongayipha abahlabeleli abasacathulayo?
VSA: Nxa ungumhlabeleli bonga uNkulunkulu ngesiphiwo sakho sokuhlabela. Okunye ngikhuthaza abahlabeleli ukuthi bahloniphe umhlaba lomphakathi abaphila kuwo baziphathe kahle ukuze ingoma zabo zibelesisindo ebantwini. Ngikhuthaza abaculi ukuthi bafunde imfundo iqakathekile ngoba yenza umuntu enze izinto lula ngakho ngithi kwabanye bami fundani ukuze lazi okutshiyeneyo. Okokucina yesabani uNkulunkulu ukuze alehlisele ukuhlakanipha lesibindi ukuze sakhe iAfrika engcono elabahlabeleli abalobuntu.
