uMthunywa
Mthwakazi omuhle kule iviki siliphathele ingadlangadla yendoda engumlingisi wodumo kwezemidlalo yobulingisi ibuye njalo ibe ngumculi werhumba.
Ijaha leli elipheka ezimnandi kangaka kambe kungaba ngubani ngaphandle kukaMothusi Bashimane Ndlovu odume ngokuthi nguMadlela uDlamudlamu. Kayilingisi nje lindoda iyingozi. Kwezokucula khona angikhulumi, ingena kuthunqe uthuli lothudlana.
Othanda ukwazi ngale indoda nansi ingxoxo ejulileyo njalo enambithekayo phakathi komdlali lo uMothusi Ndlovu (MN) lentatheli yephephandaba likazulu uCornelius Luphahla (CL).
CL: Uzulu uthanda ukwazi mayelana lembali yomsebenzi wakho lo owenzayo kanye lokuthi waqala nini jahalakithi?
MN: Mina ngakhulela esigabeni seMatulungundu eGwanda ngasengisuka ngisiza kweleSouth Africa ngemva kokuqeda uFomu 4.
Ezokuthokozisa uzulu ngaziqala ngisasenguGiredi 5 lapho engangihlabela khona ngikhokhela abafundi engangihlabela labo. Ngathi sengiseSecondary eManama lapho ngasengiphatheka emidlalweni yobulingisi ngaze ngayaqeda uFomu 4.
Ngathi sengikweleSouth Africa ngabona kungcono ukuthi ngiqhubekele phambili ngomsebenzi wami okuyikho engaqala khona ukukhipha amadlalade emidlalo etshiyeneyo kanye lawomculo.
CL: Lokhe waqala ukuba ngumdlali lokucula sowakhipha amadlalade amangaki Dlamudlamu?
MN: Njengomdlali ongelasikhathi eside waqala sengakhipha amadlalade emidlalo amathathu.
Elesine ngiyalikhipha ekuqaleni kwenyanga ezayo kuthi kwezomculo sengakhipha idlalade elilodwa elesibili ngizalikhipha lalo kunyanga ezayo.
Elakuqala ngelika 2014 lapho engakhipha khona idlalade likaMadlela 1 ngabuya njalo ngakhipha elinye idlalade lomdlalo odlalwa ku DStv kulezinsuku othiwa ngu Silence.
Kwathi ngo 2015 ngakhipha njalo uMadlela 2, ngakhipha umdlalo uBafo My Blood ngabuya njalo ngakhipha idlalade lomculi elithi Dlozi Lolaka.
CL: Abantu bathini ngomsebenzi wakho lo owenzayo mfokaNdlovu njalo ukhangelele ukubenzelani lonyaka?
MN: Lokhe ngaqala umsebenzi lo abantu bayawuncoma kakhulu njalo bangikhuthaza ukuthi ngiqhubekele phambili ngingadeli ngoba ngiyabajabulisa kakhulu.
Abanye bayangibiza endaweni ezehlukeneyo ukuthi ngizobadlalela umdlalo wami kanye lengoma zami.
Ngalokhu ke lonyaka ngikhangelele ukuhamba indawo ezehlukeneyo ngibadlalela umdlalo wami ngibuye ngibatshayele ingoma zami.
Okunye njalo mhlaka 1 Mfumfu ngizabakhiphela umdlalo wami uMadlela 3. Ngizabuya njalo ngibakhiphele elinye idlalade lezomculo ukuze bahlale bejabula.
CL: Kungani uzibiza ngokuthi unguMadlela wakoSikhobokhobo nxa usemdlalweni wakho wena udabuka eGwanda?
MN: Okwenza ngizibize ngokuthi nginguMadlela odabuka koSikhobokhobo mina ngidabuka eGwanda yikuthi igama elithi Sikhobokhobo ngathi ngilizwa ngomngane wami uDesire Moyo langichaza kakhulu ngahle ngabona kungcono ukuthi ngisebenzise lona emdlalweni wami.
CL: Umphakathi uthanda ukwazi ukuthi wandise ukudlalela ngaphi imidlalo yakho kanye lengoma zakho?
MN: Imidlalo yami ngivame ukuyidlalela kuma shows atshiyeneyo kuthi eminye iyatholakala ku DStv. Ingoma zami lazo ngizitshayela kuma shows kanye lakweminye imikhosi etshiyeneyo.
Esikhathini esinengi ngidlalela imidlalo le kweleSouth Africa ngakho kunyanga ezayo ngizayadlalela kweleBotswana kuthi ekuqaleni kukaLwezi ngizaya kwelakithi koMthwakazi ngiyejabulisa uzulu ngemidlalo yami kanye lengoma zami.
CL: Bunzima bani oyake uhlangane labo njengomdlali ongumculi njalo nkuthazo bani oyipha abaculi labadlali abasasungula?
MN: Ubunzima engiyake ngihlangane labo yikuthi abantu bayantshontsha ingoma kanye lemidlalo yami bayithengise ngentengo ephansi okudala ukuthi ngingaphakami emsebenzini wami lo.
Ngalokhu kubadlali lakubaculi abasasungula ngithi kabaqinisele bengadeli noma behlangana lobunzima.
Okunye njalo ngithi kabasebenzise iziphiwo zabo njalo kabahloniphe uzulu ukuze labo bahlonitshwe baphakame.
