uMthunywa
Thando Dube
KULOSOBHUKU wakoGodlwayo esigabeni seMzingwane oseveze ukutshiseka ngokuswelakala kwendawo zemfundo yaphezulu kanye leyemisebenzi yezandla akholwa ukuthi kungavulela abatsha endaweni yakibo amathuba okuphumelela empilweni.
UMnumzana Galet Masuku okhangele imizi engu-210 egoqela iGodlwayo 1, Godlwayo 2 leGodlwayo 3 uthe ngaphandle kokuthi kwakhiwe indawo zemfundo yaphezulu ngeke kwaba lentuthuko kulesisigaba.
USobhuku uMasuku uveze lokhu emphakathini obuthe gwaqa emcimbini wokuthakazelela ilanga lakhe lokuzalwa ngempelaviki edluleyo.
Uthe indawo yakhe ayilantuthuko ngoba kusilela izikolo zemfundo yaphezulu osokubangele ukuthi intsha yakulindawo ingatholi imisebenzi ngoba kayilalwazi ngemisebenzi eyehlukeneyo.
USobhuku uMasuku ukuveze sobala ukuthi koGodlwayo akulangqubekela phambili ngenxa yokusilela kwezikolo zemisebenzi yezandla.
Uthe ufisa ukuthi isigaba sakhe sithuthuke kuzo zonke indlela kanye lasemfundweni.
“Lamuhla ngithakazelela ilanga lokuzalwa kwami kodwa kunjalo nje kungizwisa ubuhlungu ukuthi kulentsha lapha esigabeni eswele ithuba lokuqhubeka ngezifundo kanye nje lemisebenzini.
“Uhlupho olukhona oluphambanisa intsha yendawo le yikuthi akulasikolo semfundo yaphezulu osokubangele ukuthi intsha enengi iphelele kubanga likaGrade 7. Lokhu sokuphambanise intsha kakhulu ngoba abanengi bazihlalela emakhaya njalo abangeke bathole imisebenzi ngoba bengazange benze imfundo yaphezulu,” kutsho usobhuku uMasuku.
Umkhokheli lo wengeze ngokuthi ulesifiso sokuthi kwakhiwe inkundla zemidlalo njalo koGodlwayo.
“Njengomuntu othanda imidlalo etshiyeneyo ngilesifiso sokuthi uHulumende laloba ngubani olesifiso sokusincedisa asiphathise ekwakheni indawo yokudlalela imidlalo etshiyeneyo.
“Indawo le kulapho intsha yethu ezathola ukuzithokozisa ngemidlalo njalo abanye balakho ukukhulisa amathalenta abo emidlalo bacine bedlalela amaqembu amakhulu.”
Wengezelele wathi okunye okudingakalayo esigabeni sakhe yindawo lapho intsha engafundela khona imisebenzi yezandla.
“Okunye engikufisayo yikuthi kwakhiwe indawo lapho intsha engafundela khona imisebenzi yezandla ngoba kulabanye abangaphiwanga kwezemfundo kodwa bephiwe ezandleni ngakho lokhu kuzenza benelise ukuziphilisa.
“Abasakhulayo, abalothando lwemisebenzi yezandla bazaphakama ngokuvulwa kwesikolo semisebenzi ehlukeneyo kanye lokufundisana ukutshayela izimota. Lokhu kuzavula amathuba emisebenzi okuzenza isigaba sithuthuke,” nguSobhuku uMasuku lowo.
Iphephandaba likazulu likhulume lezakhamizi ezibike ukuba zivumelana lembono kaMnu Masuku eyokuthuthukisa uGodlwayo.
UMnumzana Amos Nyoni ongumbalisi esikolo seGodlwayo Primary ubabaze usobhuku ngemisebenzi emihle ayenzayo kanye layifisayo.
“UMnu Masuku ulothando lentsha yakuleli njalo uyananzelela ukuthi ukuphakamisa intsha yikuphakamisa isigaba. Uleqembu lenguqu aliqeqetshayo njalo usesungule inkundla zemidlalo egoqela inguqu kanye lebhola lokuqaga ukuze intsha yenelise ukuzilibazisa.”
UMnumzana Busani Ncube ongumqondisi wezemidlalo esigabeni seMzingwane uthe uzancedisa uSobhuku uMasuku ngoba ebona ukuthi kuqakathekile ukusebenza ndawonye ukuze kube lentuthuko esigabeni.
“Kuyisibusiso esikhulu ukuthi kube labakhokheli besigaba abalezifiso zokubona izigaba zabo zithuthuka, lokhu kwenza labantu labo esigabeni basebenze gadalala ekuthuthukiseni isigaba,” kutsho uMnu Ncube.
