uMthunywa
YiNtatheli kaMthunywa
IQEMBU leTsholotsho FC lingena kumdlalo wesibili weligi yeCastle lidibene labomakhelwane iBulawayo City, lisazi mhlophe ukuthi abafana bekhansili babukhali njengoba beqabuka iligi ephekemeyo.
Umdlalo useBarbourfields.
Umdlalo lo ulakho ukuhlabusa ngoba kungqikilana amathimu amabili abizwa ngokuthi yiwo amancinyane kuligi le.
Iziqholo zeZhwane zinqotshiwe ngamabhola amabili kwelilodwa yiFC Platinum ngeviki edluleyo. Amakhosi ekhansili wona akhuze uvalo aqamelana leHow Mine 2-2 enkundleni yeWhite City, kumdlalo wakuqala walisizini.
Ukunqoba kwaMakhosi kumdlalo wawo wokuqala, kufake ithimu le idlabuzane, kwakhwezela abasekeli balo abakholwa ukuthi sebezayichumisa iTsholotsho ngempelaviki.
Ngemva kokuhlalisa phansi iqembu lezimbamgodi, bakhona abathandi lababukeli bomdlalo kanobhutshuzwayo weCastle abayitshayele ihlombe ithimu yekhansili.
Lakanye iqale isizini yeCastle PSL ngesivuvu iBulawayo City, kungela ocabangela ukuthi ingayangisa iHow Mine.
Umqeqetshi weBulawayo City uPhilani ‘‘Beefy’’ Ncube uthe: “I-Tsholotsho FC iqinile njalo ithembe isiqubu sabadlali bayo abasakhula. Ithimu yami ilodubo lokulalisa ingqondo emdlalweni.
“Kumalungiselelo ethu omdlalo lo sizakhuthaza abafana bethu ukuthi bahlakaniphe, kumele siyitshaye iTsholotsho,” kutsho uNcube eqeda ukuqeqetsha ithimu.
UNcube nxa ezimisele ukuyinqoba iTsholotsho FC, imvimbi zakhe kumele zivale ngci. Abagadli beTsholotsho uSimbarashe Gorogodyo, uLynoth Chikuwa loEricko Phiri balakho ukuhlukumeza phambili kwenkundla.
Impumela yemidlalo evule isizini yeCastle:
Caps United FC 3, Chapungu FC 0; Mutare City Rovers FC 0, Ngezi Platinum Stars FC 3; Hwange FC 0, Highlanders 3; Triangle United1, Harare City FC0;
Under 20: Zimbabwe 0, Botswana 2
