uMthunywa
Khona kuhle nje ukuba lenhliziyo enhle. Lokhu ngikutsho ngoba nxa muntu ethe waba lenhliziyo enhle kuba lula ukuthi loba uthe waba lohlupho umqonde uyemlandisele uhlupho lwakho. Loba engasakuncedanga ngento ongayibamba uthi nansi, uzizwa nje susizwa ngcono uzwe lohlupho lwakho seluthe cosololo.
Abanye bethu sihlala sikhala ngokuthi izinto zethu azihambi, abanye bathi bayaloywa kukanti abanye njalo bakholwa ukuthi kubangelwa yikufulathelwa ngamadlozi. Abanye njalo bezebeqambele losathane amanga bethi nguye obabophe ngamaketane. Kungela ngitsho bethelelwa umnyama ngabantu abahlala bekhuluma kubi ngabo ngoba bahamba phambilini babaphambanisela.
Yikuthi nje siyakhohlwa ukuthi umlomo uyaloya. Nxa singabantu kumele sikhuthalele ukuthi abantu bahlale bekhuluma kuhle ngathi ngoba bengakhuluma kubi bayasithelela umnyama. Kule iviki ngithole ithuba lokuxoxisana loNdlovu.
UZinhle yindodakazi eyayizalwa nguMaria Dube loSamson Moyo njalo babethathane okwesintu. UMaria wasuka wabhubha uZinhle elenyanga ezintathu. Njengoba uSamson wayengumfelwa efisa ukuthi ayengcwaba uMaria, wacela kumakhelwane wakhe uNdlovu ukuthi amsalele lomntwana yena esayangcwaba umkakhe.
USamson watshiya epakitshele uZinhle isikhwama sakhe sezitshubo lempahla ayezatshintsha ngazo nxa sethe wangcola. USamson yena wabona angathi ukuvuma kukaNdlovu ukusala loZinhle wayevuma ngitsho lokumkhulisela uZinhle.
Njengokuthembisa kwakhe uSamson kasazange agcwalise isithembiso sakhe sokuthi uzathi bengangcwaba aphenduke.
UPaul Ndlovu lomkakhe bathe bebona lokhu abazange bakhathazeke kakhulu ngoba bezitshela ukuthi uSamson wayezabuya ezolanda indodakazi yakhe.
Kuthe sekudlule iviki, uNdlovu lomkakhe bayabuza umnikazi wendlu lapho uSamson loMaria ababehlala khona ukuthi wayeseke wenzwa ngokuthi uSamson wake wabuya endlini lokhe umngcwabo wadlulayo. Kwakhanya kungela lutho umnikazi wendlu ayelwazi ngaphandle kokuthi, uSamson wayesele emngcwabeni engumuntu ozahlala ngakibo okwamalanga amabili ebesephenduka.
Kuthe sekunjalo umnikazi wendlu wazama ukuthi aye eNketa lapho ababebuthene khona ukuthi ayezwisisa ukuthi wayekhona yini ukwenzela ukuthi azobhadala imali ye-rent athathe loZinhle komakhelwane ayecele ukuthi basale bemkhangelele indodakazi yabo.
Abangakibo kaMaria bathi bona bacina uSamson sebevela emangcwabeni lapho acela khona iburial order ngoba ethi ufuna ukuyathatha incwadi yokufa kaMaria eyayizamenza enelise ukuthi athole incwadi yokuzalwa kaZinhle.
Njengoba wayengumkhwenyana owayesazalakala koMaria njalo bemethemba bamupha iburial order ukuthi enelise ukuthathela uZinhle incwadi yokuzalwa. Umnikazi wendlu wabuyela wayatshela uNdlovu lomkakhe lokhu ayesekuzwile. Lokhu kwethusa uNdlovu lomkakhe babona kungcono ukuthi baye emapholiseni bayemangala indaba le lokuthi mhlawumbe bathole usizo lokuthi bengayenza njani ngoZinhle.
Amapholisa abaxwayisa ukuthi bamgcine uZinhle engxenye uSamson wayengaphenduka esefuna indodakazi yakhe. Iviki yaguquka yabangamaviki, amaviki abazinyanga, inyanga zaba ngumnyaka.
UZinhle lamuhla seyintombazana eleminyaka elitshumi lambili njalo yena uzazi engumntakaNdlovu lomkakhe njalo kazwisisi ukuthi yindaba yena kubo bonke abantwana abakoNdlovu engelancwadi yokuzalwa.
UNdlovu lomkakhe abazange bathande ukuthi bamtshele ukuthi kwahamba njani ngoba esengumntwana omncane njalo usengalinyazwa yikuthi uyise wambalekela esesemncane njalo wamyekela wakhuliswa ngabantu angabaziyo.
Njengenhlanganiso saxwayisa uNdlovu ukuthi axoxisane lomnikazi wendlu lapho okwakuhlala khona uSamson ukwenzela ukuthi baxhumane lezihlobo zikaMaria, babesebesiya eCity Council bayedinga i-grave number abazahamba layo koMsitheli lesihlobo sikaMaria esilesithupha siyethatha incwadi yokufa kukaMaria. Nxa sebele ncwadi yokufa kukaMaria sebengayathatha ibirth confirmation record esibhedlela la uZinhle owazalelwa khona lencwadi esikolo lapho uZinhle afunda khona ukwenzela ukuthi athathelwe incwadi yakhe yokuzalwa.
Umlobi utholakala kukheli ethi , [email protected], www.trinity project.biz loba kunombolo zocingo ezithi 0773 195 055
