uMthunywa
Yintatheli kaMthunywa
U-Alexander Maseko usecabange ukuthi aphosele ibizo lakhe, angene kukhetho lokudinga umongameli wenhlanganiso yeZimbabwe Football Association, uMthunywa uyakuveza lokhu.
UMaseko owaziwa ngelithi ‘The Cool Ruler” kumbe “uZanda” kunguqu, watshibilika ngesikhathi iqembu leHighlanders lisatshila imimoya yamanye amathimu. Ukhunjulwa ngabalandeli bomdlalo abambukela ngeminyaka atshisa khona kakhulu ngama-1990s.
UMthunywa udobhe udletshana lokuthi uMaseko usalungisisa amaphepha akhe okuthi ayefaka ngokusemthethweni ibizo lakhe kumjaho wobumongameli benhlanganiso eqhuba inguqu kuleli.
Abafakazi abaqotho abaphethe indaba zomkhankaso lo kanye labangane bakhe bakubeke mgceke ukuthi uMaseko usendleleni yokuya phosela incwadi zakhe zonke emahofisini eZifa eHarare.
UMaseko uzabe engumdlali weHighlanders wakuqala ukuqunga isibindi ayencintisa ukuba ngumongameli weZifa.
“UZander (Maseko) uyangena kukhetho. Ufuna sona esikhulu, esokuba ngumongameli. Usalungisisa amaphepha lakho konke okufunekayo,” kutsho umfakazi oqotho encweba uMthunywa indlebe ngoLwesithathu.
UMaseko kubikwa ufike eZimbabwe kuliviki evela kwele-South Africa.
Iphephandaba likazulu lizame ukuthola inombolo zikaMaseko azisebenzisa nxa esekhaya. Ngemva kokutshaya ucingo okwamahola, kwehlule ukuxhumana laye ngesikhathi kusiya dindwa iphephandaba.
Ngokuzwa kwentatheli, kuthiwa uMaseko uzaziveza kuziqinti zenguqu ezivotayo ekupheleni kwaliviki.
Isibindi sikaMaseko sokuyancintisa sibatshazwa linengi labasekeli beHighlanders lamanye amakhansila eZifa ayesabe ukuqanjwa.
Omunye wamakhansila la, oseMatabeleland North uthe uMaseko ungumzekeliso wokuthi inkokheli ezikumhlubulo ongezansi yelizwe zingesabi ubukhokheli.
“Sihlala sifuna ukuthi sivotelwe ukuba ngomsekeli, okwenziwe nguZander kuyabongeka. Kaqhubeke aziveze ebantwini. Akulamuntu ovota kuZifa ongamaziyo uAlexander Maseko.
“Ukuncintisa kwakhe sekuzakhweza ukuzethemba kubadlali lalabo abadlali bakudala,” kutsho ukhansila weZifa lo.
UPatrick Manyathela ongumlandeli wenguqu eseFilabusi ubuzwe umbono wakhe ngenyathelo likaMaseko wathi:
“Abantu abanjengo-Alexander yibo esibafunayo. Mina ngambona edlala, ngezwa futhi kuthiwa ungumaneja wenhlelo zenguqu. Ulesimilo sobukhokheli, angiboni cala ngokuthi abengumongameli.
“Wadlala inguqu engakaze idlalwe ngabafana esibabona kulezinsuku. Okufuneka kunguqu yeZimbabwe uyakwazi. Engavotelwa, asebenze labantu abalengqondo uzayintshintsha inguqu yethu.”
