uMthunywa
Intatheli kaMthunywa
OWAKE wabangunobhala weqembu elikhulu iHighlanders uAndrew Tapela usekhethe ukwelula ulwazi lwakhe kunhlelo zenguqu nanko phela usedinga ukuvotelwa ukuba abe ngumongameli wenhlanganiso yeZifa kumhlubulo ongezansi yelizwe.
UTapela odume ngelithi ‘TP” okade wakhokhela inhlelo zikanobhutshuzwayo ungena kukhetho lwenkokheli oluzaqhutshwa mhlaka 14 kuMfumfu njalo uza lobungitchi obungeke butholakale kwabanye abancintisana laye. Kusikhundla sikamongameli, uTP uzancintisana loMusa Mandaza, osehlale iminyaka esesihlalweni.
UMandaza loba esekhokhele okweminyaka, abahlaziya lolukhetho bathe kasoze aphume lula kodwa kuTapela uzathola umncintiswano kuzwa. Bobabili akusatholakalanga ithuba lokuthi bazikhulumele ngenhloso yabo yokufuna amavoti, nanko phela omakhalekhukwini babo abangenanga.
Kwezinye izikhundla, bakhona abakade bekhona abafuna ukubuyiselwa ezihlalweni, uBryton Malandule obengumphathi wezemali loTumediso Mokoena-Ndlovu obelilunga lekhomithi. Kuzaba ngumncintiswano ongathambanga ngoba kungena loTizirayi Luphahla owake waba ngumaneja weBulawayo City.
UMwenda Mubita osethole inhlonipho ngokukhuthaza imvuselelo yenguqu edolobheni leFolosi uhamba phambili ekutholeni isikhundla. Ipholisa elikhulu elakhokhela iZRP Bulawayo uFiso Siziba laye ufuna ukuvotelwa.
Bekhuluma lephephandaba likazulu, bonke laba baqakathekise ukuthi kuvotelwe inkokheli ezizaletha impumela.
“Ngikhethe ukuthi ngincintise esikhundleni ngoba ngingumuntu wenguqu olobungcitshi lesikhathi eside ngikubukhokheli bomdlalo. Ngilolwazi olujulileyo oluzaphathisa inguqu yethu ngazo zonke indlela ukuze ithole impumelelo.
Engizakuqinisa kumalunga ethu yikuthi sisebenzele ukulwisana lokusilela kwemali emaqenjini. Amathimu ethu athwele nzima ukuthi ahlanganise imali yokufinyelela inkundla. Kuzamele kulungisiswe lokhu,” kutsho uMubita.
UMubita lo wavusa iqembu leMosi Rovers ngo1993. Kusukela ngo-2006 kusiya ku-2010, uMubita ubelilunga elibona ngezemali kuZifa esabelweni seMatabeleland North.
ULuphahla uthe: “Sengikunguqu okweminyaka elitshumi. Lokho kutshengisa ukuthi sekuyisikhathi sokuthi ngizame ukuncedisa kunhlanganiso ebambe umdlalo kulumhlubulo. Inhloso yami yikuthi ngilungisise i-southern region, kubelenguqu yakulezi insuku, sikhokhele umdlalo njengebhizimusi.”
