uMthunywa
YiNtatheli kaMthunywa
ZIBUKELE ibhayisikopo yamahala izakhamizi zelokitshini leCowdray Park eMaphayiphini ngemva kokuba amanye amadoda amabili atshontshe umbheda wesinye isakhamuzi sakule indawo ethutshe ewuthwele emahlombe nanko phela ubusunamathele.
Isiga lesi senzakale kuviki ephelileyo lapho uVictor Mbereko lomngane wakhe uTatenda Sinyoro abahlala eMaphayiphini eCowdray Park abatshontshe khona umbheda lezinye impahla kwesinye isakhamuzi salapha esaziwa ngokuthi nguNdlovu ngemva kwalokho umbheda lo wala ukwehla emahlombe kwaze kwaphuma ilanga, uMthunywa uyakuveza lokhu lamhlanje.
UMthunywa ukhulumisane lesinye isakhamuzi sakule indawo uMnumzana Simon Zulu ochaze ukuthi laye wakubona ngamehlo lokhu kusenzakala.
“Mina ngazibonela ngamehlo abafana behamba bebhoda indawo yonke besehluleka ukwethula umbheda emahlombe. Sathi sibabuza ukuthi bawuthethe ngaphi bathi bawutshontshe koNdlovu. UNdlovu laye bathi befika kuye wabaxotsha wathi kabayebika emapholiseni.
“Basuka-ke baqonda emapholiseni afika athi lawo kawakwenelisi lokho ngakho kufanele babuyele lapho abatshontshe khona yikho abazathola khona usizo. Lami ngacina sengiphenduka ngabacina sebesiyancenga koNdlovu,” kuchaza uMnu Zulu.
Ekhuluma loMthunywa uNkosazana Charity Murimba uchaze ukuthi okwenza amasela la abonakala yikuthi impahla zakoNdlovu zazilungiswe ngomunye umphurofethi odumileyo kule indawo.
“Okwenza umbheda lo wala ukwehla emahlombe amasela la yikuthi uNdlovu wayelungiselwe ngumphurofethi uMadzimai Sarah okhonza kubandla leJohane Masowe Wesihlanu njengoba wayesephelelwe zimpahla zitshontshwa ngamasela.
“Umphurofethi lo nguye futhi owalungisa ukuthi umbheda lo wethuleke amasela la abotshwa.
“Ngikhuluma nje lami besengitshile ngesela elalingitshontshela imibhida yami ngahamba kuMadzimai lo wafika wangilungisela ukuthi abantu bambone khathesi abantu bahlala bembona etshontsha ngakho sengizacela ukuthi laye imibhida le ingaphumi esandleni sakhe,” kutsho uNkszn Murimba.
UMthunywa wenelise ukukhulumisana loMadzimai Sarah oveze ukuthi yena usebenzisa isiphiwo sakhe ukusiza abantu.
“Mina ngisebenzisa isiphiwo engasiphiwa nguNkulunkulu ukuba ngisize abantu. Ngalokhu-ke ngisebenzisa amanzi lemithandazo kuphela njalo kangithakathi muntu,” kuphetha uMadzimai Sarah.
