uMthunywa
Lamhlanje sihlangana lomdlalo olesihloko esithi, “Mbalisi, Balis’ungabalisi!” Sizwakala sihlabusa lesi sihloko lanxa umuntu engakawubali umdlalo wakhona. Ngingazi ekuqaleni kanje ukuthi ngingabe ngiyaphambanisa ukuthi isihloko lesi silengqondo eziphikisanayo okutsho ukuthi siyisiqathaniso. Abadala bathi inhlwa kayibanjwa ngekhanda asisilandele mfundi sizwe ukuthi iyozala nkomo bani.
Kangihle ngikutsho ukuthi bangabe bekhona abafundi abanengi asebewubalile lumdlalo njalo bawuhlaziya kumbe ukuwucubungula. Ngitsho njalo ukuthi esengikubonile ekuqaleni yikuthi umbalisi uyadunyiswa njalo adunyazwe kwezinye izibanga. Kuyavela sobala indlela ababalisi abaphatha ngayo umsebenzi wabo. Bakhona abawusebenza ngobuqotho kanti abanye ngabathi basebenza okulingene lemali abayiholayo.
Uqala kuhle lumdlalo ngoba sihlangana lengoma edumisa umbalisi, umfundi ebonga izinto azenzelwa ngumbalisi.
Ingoma le itshengisa umfundi ethi uthanda umbalisi. Uthanda umbalisi nje ngoba wamnika ulwazi. Uyaphinda njalo umfundi ethi uthanda umbalisi ngoba wamnika imfundo. Uyaziqamba yena umfundi ukuthi wayeyimpumputhe okutsho ukuthi wayengazi lutho kwezemfundo kodwa umbalisi wamthungulula okuyikuthi umbalisi wamupha imfundo wazwisisa into eziphathelane lemfundo.
Uyambonga umfundi umbalisi ngamenzele khona njalo ukhuthaza ukuthi abantu bamhloniphe umbalisi.
Makahlonitshwe umbalisi ngoba ngolwazi lwakhe usebaze umlimi okutsho ukuthi abalimi bafundiswa nguye indlela zokulima. Ngolwazi lwakhe umbalisi usedale umakhi. Abakhi ulwazi baluzuza kumbalisi. Uyaqhubeka umfundi etshengisa ukuthi umbalisi kamanga ngokudala labo asebaqambile kodwa nango uselomanjinela. Kamanga lapho ngoba uqhubeka ebumba udokotela okutsho ukuthi umbalisi usefundise waphuma lodokotela.
Eceleni kukadokotela kulomongikazi laye ofundiswe ngumbalisi. Emuva kwalaba kulomabhalane laye owenza lowo msebenzi efundiswe ngumbalisi. Ubalise izizatho zokuthanda umbalisi ngezibonelo lezi aziqambileyo kodwa uyavuma ukuthi kunengi phambili okungeke sakuqeda kodwa konke lokho kungenxa kambalisi. Ngumbalisi ofaka abantu kuyo yonke imisebenzi abayenzayo ngokubabalisa.
Umlingiswa esihlangana laye kuqala kulumdlalo ubizwa ngelithi MaBhala, angikafiki kusiphetho sokuthi lelibizo lihambelana lalokho akwenzayo lumama. Lokhu kuzavela kuzigaba ezilandelayo. Uyasilandisela uMaBhala ngomsebenzi awenzayo esikolo lapha esimfica ehlezi khona. Sizwa ukuthi wafundela ukufundisa lokuthuthukisa isizwe. Esikolo lesi ungumbalisi omkhulu okhangela amantombazana. Ngenxa yesikhundla alaso, izifundo aziphetheyo zinlutshwana ukwenzela ukuthi enelise ukwenza eminye imisebenzi.
Uyaziveza yena MaBhala ukuthi uyisimakanjani. Lanxa elehofisi yakhe okumele ayisebenzise yena uthanda ukusebenzela okulabanye khona. Uthi zimbili izizatho zokwenza lokhu. Esokuqala yikuthi ihofisi yakhe incane kakhulu. Kakholisi ukusebenzela kulo. Okwesibili yikuthi ungumama ovele ethanda ukubhala njengebizo lakhe.
Sizaqala lapha kuviki elizayo.
