uMthunywa
Godfree N C Muyambo
Likuthethe njani bafundi lokho okukhulunywa ngoMpumelelo labo Sipatalala labo abazibula ngokuthi bafundisa ngcono nxa benathe utshwala? USipatalala uthi lanxa benatha utshwala ukusa kwamalanga kodwa umsebenzi bayawutshaya. Kambe akusimfundiso engalunganga na leyo? Sizoyicela ivuthiwe.
Olunye udaba oluletha udwetshu luvezwa nguMaThabo. Ukhuza uMpumelelo loSipatalala ukuthi abathule bona bafuna ukusebenza. Ingxoxo kaSipatalala loMpumelelo uthi bangaqala ukuphikisana kayipheli njalo bahlezi bephikisana ngantonye. Uyaphambili uMaThabo ethi waphambanisa uMphathi ngokunika ababalisi imvuzo. Lina lithini bafundi? Kuqondile na ukuthi uMphathi aphe ababalisi imvuzo ebonga ukusebenza kwabo?
Imvuzo leyo ayibangeli ukuthi abanye ababalisi betshone sebengabaklolodela abanye bethi bona basebenza ukwedlula abanye njalo abantwana ababafundisayo bayaphumelela? UMaThabo uveza umbono wakhe ophikisana lalokhu lapha esithi phela bangeke benze okufananayo bona befundisa izifundo ezitshiyeneyo. Lokhu kulandelwa yikweyisa abanye ababalisi kusiya ngezifundo abazifundisayo. Lokhu kwezinye izibanga kuletha ukungazwisisani phakathi kwababalisi ikakhulu kungaba lomunye umbalisi oliphakaphaka osuka ehluleke ukubalisa abantwana yena abalise amabala engwe.
Umbalisi onjalo ngulo othi kumele afundise abantwana yena abebalisa ukuthi esakhe isifundo singcono kulezabanye.
USipatalala uhlonyiswa yinkulumo kaMaThabo lapha athi khona izifundo zitshiyene. USipatalala uhle angenele uMpumelelo ethi bafundisa isintu. Uyasilulaza isifundo sesintu uSipatalala ethi: “Kambe ukhona umntwana ongehlulwa lulimi alukhuluma nsukuzonke esikolo lekhaya, ulimi lukama!” Uyaphambili ethi uyabe egula lowo mntwana, efuna ukuhlolwa ingqondo.
Siyananzelela ukuthi ugwalo lolu lulotshwe ngesikhathi singaka sebenzisi imali le eyakwanye amazwe ethiwa yiforekisi. USipatalala uthi umntwana owehlulwa yisintu yena engambhadalela ngeforekisi ukuthi ahlolwe ngudokotela lanxa engazake ayibambe imali yakwamanye amazwe. Lokhu kutshengisa sobala ukuthi uSipatalala uyaseyisa isifundo sesintu. Lalamhlanje bakhona abafundi , abazali kunye lababalisi abeyisa izifundo zesintu.
Abantu abalengqondo enje bafisa lokuthi abantwana bengafundisa izifundo zesintu kodwa bafundiswe isiLungu.
Yisihluku lesi abantu abazenza sona ngoba bencedisa ekubulaleni isizwe sakwabo. USipatalala uthi phela iSayensi yisifundo esingathambanga. Uthi isifundo seSayensi sinzima njalo ucela labo abamlaleleyo ukuthi bamkholwe nxa esithi u – A wesiNdebele ufana lo –D weSayensi. Liyakuvuma lokhu na bafundi besiNtu?
Uyaqhubeka uSipatalala eklamasela uMpumelelo ethi bona bafundisa izinto ezingaziwa ngabantwana kanti yena uMpumelelo obizwa ngelikaMpu ezikhathini ezinengi umane uyabakhumbuza nje lokho abakwaziyo abantwana.
Nansi indaba bafundi edinga ukuthi lixoxisane ngayo ngoba abanye abafundi kunye lababalisi basuke bakhangelele ezinye izifundo phansi okwenza abantwana labo bathatheke bengaqinisi ukufunda lezo zifundo. Impumela yabo emihlolisweni isuka ingabi mihle
Kuviki ezayo sizasungula indaba yethu lapho lababalisi sebekhuluma ngeholo labo lokuthi kumele kwenziweni ngakho lokho.
